Росстат дааннайынан, 2026 сыл атырдьах ыйыгар Саха сиригэр сыана от ыйынааҕар 0,1% үрдээтэ. Ас-үөл ортотунан ыараата, табаар сыаната ордук эбилиннэ, оттон өҥөлөр чэпчээтилэр, диэн Киин Баан АБ Саха сиринээҕи салаата иһитиннэрдэ.
Соҕотуопка уонна кэнсиэрбэлээһин кэмигэр саахарга наадыйыы улаатта. Бу табаары оҥорон таһаарааччылар ороскуоттарын сабарга көмөлөстө. Арассыыйаҕа саҥа үүммүт минньигэс сөбүөкүлэттэн саахары оҥоруу иэнэ эбилиннэ, онон оҥорон таһаарыы кээмэйэ сыыйа-баайа улаатан иһэр.
Солкуобай мөлтөөбүтүнэн уонна логистикаҕа ороскуот элбээбитинэн сибээстээн, төлөпүөн уонна тэлэбиисэр сыаналара үрдээтилэр. Ол эрээри тутуу матырыйаалын сыаната иккис ыйын чэпчээн турар. Ол төрүөтэ – атыыһыттар аахсыйа тэрийэн уонна сыананы түһэрэн, атыылаһааччылары бэйэлэригэр хайыһыннарыылара буолла.
Өҥө эйгэтигэр ордук тас дойдутааҕы туурдар чэпчээбиттэр, чуолаан Турцияҕа уонна Египетка. От ыйыгар туурдарга наадыйыы улаатан баран, атырдьах ыйыгар аҕыйаан, сыана түстэ. Ол да буоллар, сыл иһигэр тас дойдуга барыы-кэлии сыаната ыараата.
“От ыйынааҕар билигин наадыйыы түһэн, Арассыыйа Хара муоратын кытылыгар баар туурдар эмиэ чэпчээтилэр. Балаҕан ыйыгар, үгэс быһыытынан, сыана түһэринэн атырдьах ыйынааҕы сыана хаалар. Ити эрээри 12 ый устата Арассыыйа соҕуруу өттүгэр сынньалаҥ ыараата” – диэн Арассыыйа Баанын Саха сиринээҕи салаатын экэниэмикэ отделын салайааччыта Татьяна Дроздова бэлиэтээтэ.
Саха сиригэр сыллааҕы инфляция от ыйынааҕар үрдээн, 6,2% буолла. Арассыыйа үрдүнэн инфляция 6,0% кэнниттэн 6,3% тиийэ үрдээтэ.
