Дьокуускай куорат Дууматын дьокутааттара эрэгийиэн киинигэр өрөспүүбүлүкэ бастакы бэрэсидьиэнигэр Михаил Николаевка мэҥэ бэлиэ дуосканы туруорууну өйөөтүлэр. Бу быһаарыыны Дума 29-с сиэссийэтигэр ыллылар. Дуоска Чиряев уулуссатын 5 №-дээх дьиэтигэр баар буолуоҕа.
Сиэссийэ үлэтигэр Дьокуускай куорат баһылыга Дмитрий Садовников кытынна. Уопсайа дьокутааттар тоҕус боппуруоһу көрдүлэр.
«Куорат Дууматын 29-с сиэссийэтигэр биһиги тоҕус боппуруоһу көрдүбүт, куорат уокуругун сиригэр-уотугар сири туһаныы уонна тутуу быраабылаларыгар уларытыылары киллэрдибит. Ону тэҥэ федеральнай сокуоҥҥа сөп түбэһиннэрэн, кыра уонна орто урбааны сайыннарыыга көмө туһунан балаһыанньаҕа уларытыылары киллэрдибит. Мэҥэ бэлиэ дуоскалары туруоруу боппуруостарын, ол иһигэр биһиги бастакы бэрэсидиэммит Михаил Ефимович Николаевка аналлаах дуосканы көрдүбүт. Ол Дьокуускайга Чиряев уулуссатын 5 №-дээх дьиэтигэр туруоруллуоҕа», — диэтэ куорат Дууматын бэрэссэдээтэлэ Альберт Семёнов суруналыыстарга.
