Саха сирин баһылыга Айсен Николаев өрөспүүбүлүкэ бырабыыталыстыбатын салалтатын уонна Ил Дархан уонна бырабыыталыстыба дьаһалтатын салалтатын кытта былааннаах сүбэ мунньахха сүрүн соруктары бэлиэтээтэ.
Айсен Николаев быыбар хампаанньатын түмүктэрин таһаарда. Кини былаас уорганнарыгар уонна быыбар хамыыһыйаларыгар ыытыллыбыт үлэлэрин иһин махтанна уонна куоластааһын түмүктэрин, олохтоохтору долгутар ыйытыктары учуоттаан, сиһилии ырытар наадалааҕын эттэ.
Саха сирин баһылыга бырабыыталыстыбаҕа куоластааһын түмүктэрин уонна өрөспүүбүлүкэ олохтоохторун туруорсубут ыйытыктарын сиһилии ырыталларыгар, ону үлэлэригэр учуоттуулларыгар дьаһайда.
Сорудахтар экэниэмикэ сайдыытыгар эмиэ ананнылар. Өрөспүүбүлүкэ баһылыга хайысхалаах былаас уорганнарыгар креативнай экэниэмикэ сайдыытын тосхолун сиһилии үөрэтэллэригэр дьаһайда. Ону тэҥэ чэпчэтиилээх ипотека бырагыраамаларын олоххо киллэриини хонтуруолга тутар, баан тэрилтэлэрин кытта сибээстэһэргэ уонна нэһилиэнньэҕэ үлэлии турар өйөбүл миэрэлэрин кэмигэр иһитиннэрэргэ сорудах бэрилиннэ.
«Саҥа стратегия балаһыанньаларын өрөспүүбүлүкэтээҕи бырагыраамаларга учуоттуур уонна бу хайысха салгыы сайдарыгар арыллар кыахтары туһанар наада», — диэтэ Саха сирин баһылыга.
Биир суолталаах боппуруоһунан уматыгынан хааччыйыы буолар. Өрөспүүбүлүкэ бырабыыталыстыбата уматыгы тиэйиини тэрийиигэ уонна хотугу таһаҕаһы таһыыга үлэтин салгыыр. Айсен Николаев балаһыанньаны мэлдьи хонтуруолга тутарга уонна территориялары уматык ресурсаларынан хааччыйыыга наадалаах быһаарыылары түргэнник ылынарга дьаһайда.
«Өрөспүүбүлүкэҕэ туруктаах үлэттэн уонна дьон күннээҕи олоҕуттан тутулуктаах боппуруостарга булгуччулаах ирдэбиллэр уларыйбаттар – тохтобуллары таһаарбакка, болдьохтору тутуһан саҕаламмыты тиһэҕэр тиэрдэргэ», — диэн эрэгийиэн баһылыга эттэ.
Толоруулаах былаас уорганнарын салайааччыларыгар туруоруллубут соруктары кэмигэр бэлэмнииргэ уонна толорорго сорудах бэрилиннэ.
