Владивостокка XI Илиҥҥи экономическай форумҥа Саха сирин баһылыга Айсен Николаев Вьетнам үбүн миниистирэ Нго Ван Туаны кытта оробуочай көрсүһүүнү ыытта. Кэпсэтии биир тутаах тиэмэтинэн туристическай уонна дьыалабыай сибээһи бөҕөргөтөргө быһа чартер авиа-айаны олохтооһун буолла.
Айсен Николаев Вьетнам авиахампаанньаларын кытта быһа чартер бырагыраамаларын сөргүтэр кыаҕы көрөргө этии киллэрдэ.
Көрсүһүү Саха сирин павильонугар «Уһук Илин уулуссата» быыстапкаҕа ыытылынна, онно делегациялар эрэгийиэн инвестиционнай, туристическай уонна научнай-технологическай кыаҕын билиһиннэрдилэр.
«Биһиги эрэгийиэннэр икки ардыларынааҕы бииргэ үлэлээһиҥҥэ интэриэстээхпит. Инникилээн тутуллар хайысхаларынан тыа хаһаайыстыбата уонна айылҕа ресурсаларын тиэрдии буолаллар. Саха сирэ сир баайын хостооһуҥҥа Россия тутаах эрэгийиэнэ буолар уонна айылҕа ресурсаларын саппааһынан бастакы миэстэни ылар», — диэтэ Айсен Николаев.
