«Азия оҕолоро» 6-с спортивнай Оонньуулар арыллыыларын көрсө «Туймаада» стадион арҕаа боруотатын иннигэр биллэр судаарыстыбаннай деятель, Саха сиригэр физкультура уонна спорт хамсааһынын уһулуччулаах тэрийээччи Николай Тарскай бюһун туруоруохтара.
Сирин анаан талбыттара. Николай Тарскай физкультура уонна спорт дьыалаларыгар өрөспүүбүлүкэтээҕи кэмитиэти салайар кэмигэр бу «Спартак» стадион тутуллубута, кэлин «Туймаада» диэн ааттаммыта. 2015 сыл алтынньы 12 күнүгэр Ил Дархан Ыйааҕынан бу спорт объегар кини аата иҥэриллибитэ.
Бюст саҥаттан оҥоһуллубат, скульптор Василий Бочкарев үлэтин Уус Алдан улууһун Бороҕонуттан көһөрөн аҕалыахтара.
СӨ спорка министиэристибэтэ өйдөбүнньүк бэлиэ тутуутун бэйэтин тус хонтуруолугар ылыаҕа. Үлэ бэс ыйын бүтэһигэр түмүктэниэхтээх.
Бюст өрөгөйдөөх арыллыыта Оонньуулар иннилэринэ аҕай тэриллиэҕэ.
