17 Тохсунньу 17.01
  • -48°
  • $ 73,82
  • 83,32

Сунтаар Герой-Ийэтин уон уола армияҕа сулууспалаабыта

17:22, 17 марта 2016
Текст:

Оҕону иитиигэ, дьиэ кэргэн сыаннастарын харыстааһыҥҥа, сайыннарыыга, өрөспүүбүлүкэ социальнай-экономическай сайдыытыгар кылааттарын киллэрбит Герой ийэлэргэ Ил Дархан Егор Борисов 1500 мөл.солк. суумалаах харчынан бириэмийэтин анаабытын туһунан суруйан турабыт. Бу бириэмийэнэн наҕараадаламмыттар ортолоругар Сунтаар улууһун Элгээйитигэр олорор 14 оҕо (12 уол, 2 кыыс) тапталлаах ийэтэ Раиса Алексеевна Игнатьева баар.


Раиса Игнатьева олоҕун оҕону иитиигэ анаабыта, Элгээйи с. «Чуораанчык» уһуйааныгар үлэлээбитэ. «Ийэ мэтээлин» хас да истиэпэнинэн, «Ийэҕэ албан аат» мэтээлинэн наҕараадаламмыта, 1978 с. Герой-ийэ үрдүк аатын сүкпүтэ. Игнатьевтар оҕолоруттан 10 уол аармыйаҕа сулууспалаан ытык иэһин толорбута.

Элбэх оҕону иитэрбэр аһылык да, таҥас да кырыымчыгын улаханнык билбэтэҕим. Улахан уолаттар бэйэ-бэйэлэрин көрсөн, тэҥинэн улааппыттара. Судаарыстыба көмөлөһөр этэ. Хас биирдии оҕоҕо харчы көрүллэрэ. Биэс солкуобай да буоллар, син добуочча харчы курдук буолара.

Отут сиэннээхпин, уон биир хос сиэннээхпин. Кинилэр үксүлэрэ ыллыыллар, үҥкүүлүүллэр, спордунан дьарыктаналлар. Саамай улахан сиэним Анна Игнатьева ырыа суруйар. Кини ырыатын толороллорун истэн, олус үөрэбин уонна долгуйабын. Уопсайынан, сиэннэрим бука бары талааннаахтар. Аан дойдутааҕы, өрөспүүбүлүкэтээҕи куонкурустар, ол иһигэр оҕо «Евровидениетын», кыайыылаахтара. Биир сиэним боксаҕа спорт маастара, үс сиэним спорт маастарыгар кандидат. Уолаттарым тиэхиньикэҕэ сыһыаннаахтар, үс уолум кадровай булчут. Атыттар Дьиэ-уот коммунальнай хаһаайыстыбатгар, Ыксаллаах быһыы-майгы министиэристибэтигэр уонна тыа хаһаайыстыбатыгар үлэлииллэр. Кыыһым Людмила – медицинскэй сиэстэрэ, Альбина – хореограф.

Киһи баайа – оҕолоро. Оҕолоруҥ этэҥҥэ, киһи тэҥинэн олорор, үлэлиир-хамсыыр, кэнчээри ыччаттарын иитэр буоллахтарына, эйиэхэ күүс-уох биэрэр ордук туох баар буолуой?! Бу барыта – дьахтар, ийэ, эбээ буолан ананан кэлбит киһиэхэ сирдээҕи дьолум буолар, — диэн кэпсиир Герой-ийэ.

2011 с. Раиса Алексеевна кэргэнэ Семен Васильевич оҕону иитиигэ уонна дьиэ кэргэни бөҕөргөтүүгэ кылаатын иһин «Ытык аҕа» Бэлиэнэн наҕараадаламмыта. Иллээх-эйэлээх ыал «кыһыл көмүс» сыбаайбаларын бэлиэтээбиттэрэ.

0
0
17 января 17.01
  • -48°
  • $ 73,82
  • 83,32