28 Тохсунньу 28.01
  • -48°
  • $ 73,82
  • 83,32

Саха тыйаатыра 115-с театральнай сезонугар үс сааланан үлэлиэ

18:02, 08 сентября 2020
Текст:

Бүгүн Ил Дархан уонна Бырабыыталыстыба дьаһалтатын салайааччы Афанасий Владимиров Саха тыйаатырын кэлэктиибигэр саҥа дириэктэри — Петр Макаровы билиһиннэрдэ, тыйаатыр саҥа 115-с театральнай сезонугар былааннарын иһиттэ.


«Петр Макаров тыйаатырга саҥа киһи буолбатах, кини бэйэҕит искититтэн үүнэн-сайдан тахсыбыт салайааччы. Артыыс идэтиттэн саҕалаан, аҕа саастаах уһуйааччыларын Андрей Борисов, Анатолий Николаев көмөлөрүнэн, салайааччыга тиийэ үүннэ. Инникитин, биир сомоҕо буолан, Саха норуотун култууратын биһигэр — Саха тыйаатырыгар саҥа саҕахтары тэлиэ, салгыы сайыннарыа диэн эрэнэбин«, — диэтэ Афанасий Семенович.

Саҥа 115-с театральнай сезон быйыл алтынньы 17 күнүттэн саҕаланара былааннанар. Бэлиэ түгэн үс күн салҕаныа. Алтынньы 17 күнүгэр сүрүн саалаҕа Арассыыйа үтүөлээх артыыһыгар, Саха сирин норуодунай артыыһыгар Анатолий Николаевка аналлаах дьоро киэһэ ыытыллыа. Алтынньы 18 күнүгэр аччыгый саалаҕа испэктээх туруо, оттон алтынньы 19 күнүгэр Анемподист Софронов-Алампа «Таптал» драматынан саҥа 50 миэстэлээх «Алампа» саалатын арыйыахтара. «Быйыл тыйаатыр үс сааланан тэҥинэн үлэлиэ. Уруккута режиссер хоһун, итиэннэ аччыгый сааланы уларытан туппуппутун туһаныахпыт», — диэтэ салайааччы.

Сыл бүтүөр диэри Андрей Борисов, Руслан Тараховскай, Сергей Потапов туруорууларыгар үс саҥа испэктээх туруоруллара былааннанар.

Петр Макаров тыйаатыр кэлэктиибэ САССР 100 сыллаах үбүлүөйүгэр бэлэмнэнии үлэтин саҕалаабытын, улахан өрөмүөн үлэтэ барарын, кэлэктиипкэ саҥа идэлээх үлэһиттэр кэлэллэрин, инникитин IT-технологияларын сайыннарар былааннааҕын билиһиннэрдэ.

0
0
28 января 28.01
  • -48°
  • $ 73,82
  • 83,32