Саха сиригэр 2026 сылга сайыҥҥы чэбдигирдэр хампаанньаҕа бэлэмнэнии салҕанар. Быйыл оскуола оҕолоругар 478 сынньалаҥ уонна чэбдигирдэр тэрилтэлэр үлэлиэхтэрэ. Былаан быһыытынан, 120 тыһыынчаттан тахса оҕону хабан, тэрээһиннээх сынньалаҥ уонна дьарык араас көрүҥнэрэ ыытыллыахтара. Бу туһунан www.sakha.gov.ru сайт иһитиннэрэр.
Саха Өрөспүүбүлүкэтин үөрэх уонна наука министиэристибэтэ иһитиннэрбитинэн, бастакы реестрга 368 күнүскү лааҕыр, 42 куорат таһынааҕы стационарнай лааҕыр, 38 үлэ уонна сынньалаҥ лааҕыра уонна 30 палаткалаах лааҕыр киирбиттэр. Оҕолору каникул кэмигэр хабыыны кэҥэтэр сыалтан, 20 тыһыынчаттан тахса оҕоҕо анаан кылгас болдьохтоох эбии үөрэх бырагыраамалара үлэлиэхтэрэ.
Дьокуускай олохтооҕо, икки оҕо ийэтэ Ангелина Николаева бэлиэтииринэн, өрөспүүбүлүкэҕэ оҕо лааҕырдарыгар наадыйыы олус үрдүк.
«Оҕолор сылы быһа сайыны уонна лааҕырга барыыны кэтэһэллэр. Кинилэргэ бу сынньалаҥ эрэ буолбакка, саҥа доҕоттору булуу, алтыһарга үөрэнии уонна бэйэни көрүнүү буолар. Сменалар кэннилэриттэн оҕолор өссө сэргэхсийбит, эрэллээх уонна көхтөөх буолаллар. Чэбдигирдэр лааҕырдар оҕолорго үөрэх сылын кэнниттэн чөлүгэр түһэллэригэр уонна туһалаахтык сынньаналларыгар көмөлөһөллөр», — диэн кини санаатын үллэстэр.
Саха Өрөспүүбүлүкэтин үөрэх уонна наука министиэристибэтэ сайыҥҥы хампаанньа былаан быһыытынан баран иһэрин бэлиэтиир. Оҕолорго куттала суох, ис хоһоонноох уонна тиийимтиэ сынньалаҥы хааччыйыы – сүрүн сорук.
Нуорма баазатын тупсарыыга ураты болҕомто ууруллар. Быйыл федеральнай сокуоннар уларыйыыларыгар сөп түбэһиннэрэн, биэдэмистибэлэр икки ардыларынааҕы хамыыһыйа састааба саҥардылынна, инбэлиит оҕолорго уонна доруобуйаларыгар хааччахтаах оҕолорго квоталар олохтоннулар, ону тэҥэ муниципальнай тэриллиилэргэ оҕо сынньалаҥын тэрийиигэ субсидиялар бэрилиннилэр.
Ыам ыйын 15 күнүттэн кэтээн көрөр уорганнар бэрэстэбиитэллэрин кытта лааҕырдары бэлэмнээн көрүү саҕаланна. Террор куттала суох буолуута, баһаартан сэрэхтээх буолуу уонна санитарнай-эпидемиологическай ирдэбиллэр тутуһуллууларын бэрэбиэркэлэнэр.
Төрөппүттэр путевка ылар сайабылыанньаларын Госуслуги портал нөҥүө, лааҕырга тус бэйэлэрэ эбэтэр почтанан биэриэхтэрин сөп. Сайабылыанньалары биэрии сүрүн ньыматынан электроннай көрүҥ буолар. Дьиэ кэргэттэргэ табыгастаах буоларын туһугар, исписэлиистэр өрөспүүбүлүкэтээҕи төрөппүт мунньаҕын уонна Госуслуги нөҥүө сайабылыанньалары толорууга маастар-кылааһы ыыттылар.
Сайын сынньанар улахан былаһааккаларынан «Сосновый Бор», ону тэҥэ «Кэскил» уонна «Энергетик» лааҕырдар буолаллар.
«Ааспыт сылга «Илгэ» лааҕырга саҥа корпустары үлэлэттибит, бу дойду үөрэх министиэристибэтин өйөбүлүнэн Мэҥэ Хаҥалас улууһугар үлэҕэ киирбитэ. Сыыппаралары көрдөххө, бу лааҕырга сынньаммыт оҕо ахсаана сэттэ төгүл улааппыт», — диэн Саха сирин баһылыга, «Биир ньыгыл Арассыыйа» баартыйа региональнай салаатын сэкирэтээрэ Айсен Николаев эттэ.
Оҕо сынньалаҥын уонна чэбдигирдэр систиэмэтин сайыннарыы үлэтэ «Биир ньыгыл Арассыыйа» баартыйа норуот бырагырааматын «Новая школа», ону тэҥэ Владимир Путин көҕүлээбит «Дьиэ кэргэн» уонна «Эдэр ыччат уонна оҕолор» национальнай бырайыактарын чэрчитинэн ыытыллар.
