Нөмүгүтээҕи «НХЗ Групп» диэн Саха сирин биир бөдөҥ килиэп оҥорон таһаарааччыта от ыйын 10 күнүттэн килиэп сыанатын үрдэтэр. Килиэп атыыга тахсар сыаната тута 12 солкуобайынан ыарыырын тэрилтэ ЯСИА-ҕа иһитиннэрдэ.
«Оннук, информация сөп. Уматык, бурдук, доруоһа, логистика барыта ыараата, ол аата бородууксуйаны оҥорорго туттар матырыйаалларбыт бүтүннэрэ. Биһиги ночооттоохтук үлэлиир кыахпыт суох, онон сыананы күһэйии быһыытынан үрдэтэбит. Үлэһиттэрбитигэр хамнас төлүүр эбээһинэстээхпит, эппиэтинэстээхпит», — диэн «Вик Арт» ХЭУо генеральнай дириэктэрин солбуйааччы Евгений Никифоров ЯСИА-ҕа быһаарда.
Килиэп атыыга тахсар сыаната биир буханкаҕа 79 солкуобай буолуоҕа. Ол гынан баран, Дьокуускай куорат маҕаһыыннара бэйэлэрэ эбии сыана быһаллар.
«Бэйэбит маҕаһыыннарбыт суох, сүрүннээн килиэби эрэ тиэрдэн биэрэбит. Билигин куорат маҕаһыыннарыгар килиэби 67 солкуобайга биэрэбит, оттон от ыйын 10 күнүттэн 79 солкуобайга атыылыахпыт», — диэтэ Никифоров.
Кини сэлээкрэ тиийбэккэ, улуустарга килиэп тиэрдиигэ ыарахаттары көрсүбүттэрин эттэ. «Улахан дизель массыыналарбытын бэнсиининэн айанныыр грузовиктарынан уларытарга күһэллэбит. Ити эмиэ эбии ороскуот», — диэн кини эттэ.
Нөмүгүтээҕи килиэп собуота — Саха сиригэр килиэп-буулка уонна кондитерскай оҥоһуктары оҥорон таһаарааччылартан, тарҕатааччылартан биир бөдөҥнөрө. Хампаанньа 2010 сыллаахха тэриллибит. Тэрилтэ Хаҥалас улууһун Ой сэлиэнньэтигэр баазаланар.
