Дьокуускайга СӨ Бастакы бэрэсидьиэнэ М.Е.Николаев аатынан саҥа уларыйбыт проспекка, саҥа дьиэ үлэҕэ киирдэ, суруйда «Саха сирэ» саайт.
Ол курдук, 123 ыал саҥа дьиэ күлүүһүн тутта. Манна даҕатан эттэххэ, өрөспүүбүлүкэҕэ хотугу улуустарга эмиэ дьиэни-уоту тутуу үлэтэ көхтөөхтүк ыытыллар. Оттон уопсайынан, 2023 сылга эрэгийиэҥҥэ олорор дьиэни тутууга, аныгы кэм устуоруйатыгар, рекорд олохтоммут диэн ыйыллар.
Манна даҕаттахха, Саха сирэ тутууга тэтиминэн Уһук Илиҥҥэ бастыҥнар кэккэлэригэр сылдьара ыйыллан турар. Ил Дархан Айсен Николаев эппитинэн, эрэгийиэн былырыын олорор дьиэни-уоту тутууга үчүгэй көрдөрүүлээх. Маныаха далааһыннаах үлэ ыытыллыбыта 1990 сыллаахха бэлиэтэммитэ эмиэ ахтыллар. Оччолорго 744 тыһ. кв. м тутуллан үлэҕэ киллэриллибитэ бэлиэтэммит.
Бу хаарбах туруктаах дьиэттэн дьону көһөрүүгэ үлэ тэтимнээхтик ыытылларын мэктиэтинэн буолар. Олорор дьиэтин 61 тыһ. киһи уларытыахтааҕа ыйыллар. Онно анаан 1,2 мөл. кв. м. тутуллуохтаах. Билигин бу далааһыннаах улахан былаантан аҥара туолбут: 2019 сылтан 32 тыһ. киһи көһөрүллүбүт. Маныаха национальнай бырайыак баар буолан, хоту улуустарга олорор дьиэни-уоту тутуу үлэтэ эмиэ тиһиктээхтик ыытыллара бэлиэтэнэр.
Маны сэргэ «Үөрэх» национальнай бырайыак иитинэн, Саха сирин хотугу улуустарыгар кэнники биэс сылга сэттэ оскуола уонна алта оҕо саада тутуллубут. Саҥа тутуулар аныгы лабораторнай тэрилинэн, компьютернай кылаастарынан хааччыллыбыттар.
