Уус Алдан улууһугар, Курбуһахха, «Чуораанчык» оҕо саадыгар бээтинсэ күүтүүлээх күн. Бу күн кырачааннарга бибилэтиэкэ үлэһитэ Марфа Пестрякова кинигэ кэһиилээх кэлэр.
Марфа Анатольевна бэлиэтииринэн, кырачааннары остуоруйалар, оҕолорго аналлаах хоһооннор умсугуталлар. Маныаха хас көрсүһүүлэрэ анал тиэмэлээх, хайысхалаах. Холобур, «Баал Хабырыыс поэзиятыгар ыалдьыттыыбыт» акция олунньуттан саҕаламмыт. Бу кэм устатыгар оҕолор уран тыллаах бэйиэт туһунан билбиттэр, хоһооннорун үөрэппиттэр. Ытык киһи төрөөбүт күнүгэр анаммыт тэрээһиҥҥэ кинилэр аахпыт айымньыларыгар олоҕуран дьоннорун кытта кинигэ оҥорон аҕалыахтаахтар, хоһоонун өйтөн ааҕыахтаахтар.
