2026 сылтан орто профессиональнай үөрэх тэрилтэлэрин бүтэрээччилэр үрдүк үөрэххэ кинилэр квалификацияларыгар сөп түбэһэр эрэ профильнай идэлэргэ киириэхтэрэ. Бу туһунан ХИФУ пресс-сулууспата иһитиннэрдэ.
Профиль сөп түбэһэр буоллаҕына, абитуриеннар урукку курдук үрдүк үөрэх кыһатыгар иһинэн ыытыллар эксээмэннэри эрэ туттараллар, БКЭ ирдэммэт. Оттон колледж выпускнига профильтан атын бырагырааманы таллаҕына, БКЭЭ түмүктэринэн эрэ киирэр кыахтаах.
Колледжка ылыллыбыт квалификация үрдүк үөрэх бырагыраамаларыгар сөп түбэһэрин Хотугулуу-Илиҥҥи федеральнай университет саайтыгар баар анал классификаторынан билиэххэ сөп.
«Сүрүнэ: профиль сөп түбэһэр буоллаҕына — БКЭ суох, иһинэн ыытыллар эксээмэннэр эрэ. Сөп түбэспэт буоллаҕына — БКЭ туттарыахха наада. Өйдөөҥ: БКЭ түмүгэ биэс сыл (2022–2026) дьайар. Классификатор эрдэттэн хайысханы былаанныырга уонна ханнык бырагыраамалар баалларын көрөргө көмөлөһөр», — диэн ХИФУ пресс-сулууспата быһаарда.
Саха сиригэр 215 идэҕэ 43 орто профессиональнай үөрэх тэрилтэтэ үлэлиир. Бу каадырдары бэлэмнээһини эрэгийиэннээҕи үлэ ырыынагын ирдэбилигэр туһаайар кыаҕы биэрэр.
Каадырдары бэлэмнээһин тиһигин сайыннарыы Арассыыйа бэрэсидьиэнэ Владимир Путин көҕүлээбит «Эдэр ыччат уонна оҕолор» национальнай бырайыагын чэрчитинэн ыытыллар. Бырайыакка «Каадырдар» хайысхаҕа — үөрэх хаачыстыбатын үрдэтиигэ уонна аныгы үөрэх эйгэтин тэрийиигэ — ураты болҕомто ууруллар.
