Дьокуускай куорат Марха, Тулагы, Хатас, Табаҕа, Севернай мкр, Сайсары, Автодорожнай, Гагаринскай, Строительнай уокуруктарга ВЭБ.РФ кыттыгастаах оскуолалар тутуллаллара былааннанар.
Ил Дархан сэтинньи 24 күнүгэр ыыппыт мунньаҕар куорат баһылыгын э.т. Евгений Григорьев 990 миэстэлээх 12 эбийиэк тутуллара былааннанарын билиһиннэрдэ. Григорьев кэлэр сыл олунньутугар куорат дьаһалтата 8 сир учаастагын, бэс ыйыгар эбии түөрдү арендаҕа биэрэргэ бэлэмин эттэ.
Айсен Николаев экэниэмиэкэ, үөрэх, архитектура министиэристибэлэригэр, куорат дьаһалтатыгар туһаайан үлэни торумнууру сорудахтаата. Кини ВЭБ.РФ тэрилтэни кытары барыллаан сөбүлэһии барбытын эттэ. «Уопсай сүбэнэн бырайыак сотору кэминэн олоххо киирэригэр эрэнэбин», — диэтэ кини.
