Быйыл Хотугулуу-илиҥҥи федеральнайдааҕы университет үөрэххэ туттарсыыга докумуоннары электроннай көрүҥүнэн ылыаҕа. Тутар хамыыһыйа үлэтигэр киллэриллибит уларыйыылар тустарынан үрдүк үөрэх кыһатын проректора Михаил Федоров Якутия24 ханаалга кэпсээтэ диэн, СИА иһитиннэрэр.
М.К. Аммосов аатынан ХИФУ тутар хамыыһыйата бэс ыйын 20 күнүттэн үлэтин саҕалыаҕа. Быйылгы дьыл, ааспыт сыллардааҕыны кытта тэҥнээтэххэ, киэбин уларытыаҕа. Абитуриеннар докумуоннара электроннай көрүҥүнэн тутуллуоҕа. Маны сэргэ киирии эксээмэннэрин ыытыы уонна докумуон тутуутун болдьохторо уларыйыаҕа.
«Докумуоннар электроннай көрүҥүнэн тутуллаллар. Россия почтатынан уонна атын тэрилтэлэринэн ылыллыбат. Ол иһин биһиги онно сөптөөх докумуоннары үөрэх тэрилтэлэригэр бэлэмниибит, оҕолорун үрдүк үөрэххэ киириэхтэригэр диэри арыаллыылларыгар анаан», — диэтэ проректор Михаил Федоров.
Кини бэлиэтээбитинэн, абитуриеннарга барыларыгар түргэн интернет суох. Ол иһин оскуолалар бэйэлэрин выпускниктарыгар көмөлөһөллөрө наадалаах.
Маны сэргэ университекка киириигэ математика, нуучча тыла уонна атын предмеиттэргэ эксээмэннэр дистанционнайдык ыытыллыахтара. Онно анаан консультациялар буолуохтара.
