2025 сылга Өлүөхүмэ улууһугар тырааныспарынан сылы эргиччи айанныыр бырайыак бастакы түһүмэҕэ түмүктэннэ. Даппарай — Токко хайысханан 30 килэмиэтирдээх суол үлэҕэ киирдэ. Бу учаастакка үс муоста тутулунна. Саҥа суол национальнай нэһилиэктэр олохтоохторугар улахан суолталаах түгэнинэн буолла.
«Урут бу суолга айан алта чаастан сууккаҕа диэри бириэмэни ылара, билигин куоракка диэри балтараа-икки чааһынан, оттон Даппарайга диэри 20 мүнүүтэнэн тиийиэххэ сөп. Саҥа суол айан бириэмэтин биллэ кылгатта уонна айаны ордук табыгастаах оҥордо», — диэн Даппарай сэлиэнньэтин олохтоохторо бэлиэтээтилэр.
Быйыл Өлүөхүмэ улууһун өттүттэн «Умнас» сезоннааҕы массыына суолугар Солянка — Харыйалаах — Балаҕаннаах учаастагар оҥоруу ыытыллар. Учаастак уһуна 40,52 км тэҥнэһэр, диэн Саха сирин тырааныспарга уонна суол хаһаайыстыбатыгар министиэристибэтэ чопчулаата.
Биэдэмистибэҕэ «Умнас» суол Тиит-Арыы — Тумул — Баатамай учаастагар тутууга бырайыактыыр-сметалыыр докумуону оҥорорго судаарыстыбаннай хантараактар түһэрсиллибиттэрин эттилэр. Бу учаастак уһуна 24 км.
Санатан эттэххэ, 2024 сылга Өлүөхүмэ улууһугар «Умнас» сезоннааҕы массыына суолун Солянка — Харыялаах — Балаҕаннаах учаастагар уһатыллыбыт болдьохтоох туһаныыга үлэ ыытыллыбыта. Онно эмиэ 10 км ыраахтаах бастакы түһүмэх үлэҕэ киирбитэ.
Сиһилии манна ааҕыаххытын сөп.
