Ил Дархан Айсен Николаев Федерация Сэбиэтигэр «Час субъекта» түһүмэххэ этиитигэр Өлүөнэ муостатын тутууну сүрүн бырайыак быһыытынан бэлиэтээтэ. Илин Сибиири уонна Уһук Илини холбуур улахан дьаһал буолара этилиннэ.
Федерация Сэбиэтин бэрэссэдээтэлэ Валентина Матвиенко эппитинэн, бырайыагы олоххо киллэрии түргэтиэхтээх, суруйар СИА.
«Муоста соҕотох транспортнай ситими, үс федеральнай уонна биэс региональнай суоллары, Амур — Саха сирэ тимир суол магистралын, норуоттар ардыларынааҕы аэропорт уонна өрүс пуордун холбуур. Бу инфраструктураҕа эрдэ угуллубут улахан инвестициялар эффективностарын улаатыннарыаҕа. Арктика уонна Уһук Илин Россия Азиатскай-Тихоокеанскай региоҥҥа тахсыытыгар саҥа транспортнай көрүдүөр территорияларынан буолаллар. Энергосистиэмэ уонна транспортнай көрүдүөрдэр 70-80-с сыллардааҕы экономика ирдэбилинэн тутуллубуттара харгыстыыр. Саха сирин баайдаах сирдэрин хаһаайыстыба эргииригэр толору киллэриигэ Илин Сибииртэн массыына суолун Иркутскайтан Охотскай муораҕа диэри Саха сиринэн уонна Магадан уобалаһынан тутар наада», — диэтэ өрөспүүбүлүкэ баһылыга.
Өлүөнэ муостата Илин Сибииртэн Саха сиринэн Магадан уобалаһыгар, салгыы Охотскай муораҕа тахсыылаах массыына суолун тутууга сүрүн боппуруос буолар. Тэҥинэн Магадаҥҥа диэри тимир суолун тутууга кыах үөскүүр.
Федерация Сэбиэтигэр бэлиэтээбиттэринэн, Саха сирин экономиката үчүгэй көрдөрүүлэрдээх, регион этиитин өйүүргэ бэлэмнэр.
«Сайдыылаах региоҥҥа аныгылыы тиийимтиэ уонна эрэллээх инфраструктура наада. Сүрүн соругунан транспорт сибээһэ наада. Саха сиригэр нэһилиэнньэ 20,9% эрэ сылы эргиччи суоллаах сиргэ олорор. Манна күүстээх федеральнай болҕомто наада. Транспортнай ситим биир кэлим сайдыытын көрүөххэ наада: аэропортары реконструкциялааһынтан саҕалаан суоллары, муосталары тутууга тиийэ. Өрөспүүбүлүкэ салалтата бу боппуруоһу сөпкө туруорсар, федеральнай киин көмөтө суох кыаллыбат. Регион олохтоохторун баҕа санаата — Өлүөнэ муостатын тутуу. Бу салалта амбицията буолбатах, олох ирдэбилэ! Федеральнай бюджет боппуруоһу 2025 сылга киллэрдэ, тутуу саҕаланарыгар бары сатанары оҥоруохха наада», — диэтэ Валентина Матвиенко.
Хаартыска: Андрей Сорокин, Мария Васильева, СИА
