Ытыктабыллаах Саха сирин хоту дойдутун аҕыйах ахсааннаах төрүт норуоттарын VII съеһин делегаттара уонна ыалдьыттара! Өрөспүүбүлүкэ салалтатын аатыттан эһигини быйыл “Ааспыты ытыктыыбыт, инникибитин түстүүбүт” девизтээх ыытыллар съезд үлэтэ саҕаламмытынан эҕэрдэлиибин!
Бу тэрээһин Саха сиригэр уонна Россия Арктикаҕа сытар бары регионнарыгар дьоһун суолталаах түгэнинэн буолар. Хоту дойду аҕыйах ахсааннаах төрүт норуоттарын интэриэстэрин көмүскээһиҥҥэ сыһыаннаах кыһалҕалары туруорсан, ол иһигэр сир баайын, айылҕаны туһаныыга, төрүт дьарыктар, духуобунаһы, төрүт историко-култуурунай эйгэни харыстааһыҥҥа, биһиги бары итилэри быһаарар суоллары көрдүүбүт. Муниципальнай, регионнааҕы уонна федеральнай былаас, төрүт олохтох нэһилиэнньэ, Саха сирин аҕыйах ахсааннаах төрүт норуоттарын ассоциациятын уонна биисинэс–түмсүү өттүлэриттэн хамсааһын баар, үгүс дьон бары бииргэ үлэлээтэхтэринэ эрэ билиҥиҥ кэмҥэ хотугу норуоттар олорор эйгэлэрин уонна үгэс буолбут олохторун көмүскүүр кыахтаахпыт.
Бүгүн сир баайдаах өрөспүүбүлүкэ сирин-уотун бырамыысыланнас баһылааһынын уонна хоту дойду уйан экологическай тиһигин икки ардыларыгар лоп курдук ортотун тутуһарбыт ирдэнэр. Мантан Хоту дойду төрүт норуоттарын олохторун таһымын үрдэтии уонна инники дьылҕалара тутулуктаах. Саха сирин тутуһар санаата уларыйбат – болҕомто киинигэр киһи, Уһук хоту дойду олохтооҕо туруохтаах.
Биһиги уйаара-кэйээрэ биллибэт өрөспүүбүлүкэбит Арктикаҕа сытар оройуоннарын олохтоохторун бырааптарын көмүскээһин регионнааҕы сокуоннаһы оҥоруунан бигэргэммитэ. Биһиги төрүт нэһилиэнньэ үтүө үгэстэригэр сүгүрүйэбит, төрүт олохтоохтор төрөөбүт тылларын уонна култуураларын харыстыыр үлэни өйүүбүт.
Биһиги өйдүөх тустаахпыт: хоту дойду олохтоохторун ураты цивилизациялара айылҕаны баһылааһыҥҥа буолбакка, айылҕалыын бииргэ буолууга сытар.
VII съезд мунньуллубут кыһалҕалары дьүүллэһиигэ уонна билиҥҥи олох ирдэбиллэригэр сөп түбэһэр быһаарыныылары ылыныыга көдьүүстээх түһүлгэнэн буоларыгар эрэнэбин. Делегаттарга сэргэх дьүүллэһиилэри, төрөөбүт дойду туһугар ситиһиилээх үлэни баҕарабын!
Егор Борисов, Саха Өрөспүүбүлүкэтин Ил Дархана
