Дьокуускайга уонна киин оройуоннарга 30 кыраадыс итии кэнниттэн, салгын температурата эмискэ түһүө. Оптуорунньукка, атырдьах ыйын 4 күнүгэр, өрөспүүбүлүкэ киинигэр күнүскү температура бэнидиэнньиктээҕэр 8 кыраадыс намыһах буолуо.
Саха сиринээҕи УГМС иһитиннэрэринэн, оптуорунньук түүн +9…+11 кыраадыска диэри тымныйыа, кыра ардах түһүө. Күнүһүн синоптиктар баара-суоҕа +17…+19 кыраадыһы билгэлииллэр (бэнидиэнньиккэ +25…+27 буолбута).
Кииҥҥэ уонна арҕаа өттүгэр кыра ардах түһүө, күнүһүн соҕуруу уонна соҕуруулуу-илин орто ардах күүтүллэр. Томпо уонна Өймөкөөн оройуоннарыгар сорох сирдэринэн күүстээх ардахтар түһүөхтэрэ. Кэбээйи, Эдьигээн уонна Үөһээ Дьааҥы оройуоннарыгар хотуттан 15–20 м/с түргэннээх тыал түһэрин сэрэтэллэр.
Күнүһүн киин оройуоннарга +18…+23, хотугулуу-арҕаа +13…+18, хайалаах сирдэргэ +5…+10 кыраадыс буолара сабаҕаланар.
