Дмитрий Коркин сырдык аатыгар ыытыллар турнир Дьокуускайга араас дойдулар бөҕөстөрүн алтынньы 14 — 17 күннэригэр түмүөҕэ. Билиҥҥи туругунан, 12 дойду сүүмэрдэммит хамаандата кыттарын биллэрдэ. Быйылгы күрэхтэһии Монреаллааҕы Олимпийскай оонньууларга кыттыбыт спортсменнар Павел Пинигин, Роман Дмитриев уонна Александр Иванов кыайыыларын 45 сылыгар ананар, суруйар СИА.
«Дмитрий Коркин турнирыгар Россия уонна тас дойдулар бастыҥ бөҕөстөрө кытталлар. Билигин 12 хамаанда сайаапкаларын тиксэрдилэр. Биһиги күрэхтэһиини үрдүк таһымҥа ыытыахтаахпыт. Саамай улахан баҕа санаабыт — турнир көрөөччүлээх барыытын тэрийии, Роспотребнадзор ирдэбилин тутуһан, билигин холбоһуктаах санитарнай боротокуол оҥоһуллар. Тустууну сэҥээрээччилэри үөрдүбэтэхпит ыраатта», — СИА-ҕа спорт миниистирин бастакы солбуйааччыта Леонид Спиридонов эттэ.
Кини эппитинэн, быйылгы турнир Дмитрий Коркин иитиллээччилэрэ — Павел Пинигин, Роман Дмитриев уонна Александр Иванов Олимпийскай оонньууларга кыайыыларын 45 сылыгар ананыаҕа. Оччолорго Саха сирин тустууга оскуолатын спортсменнара биир кыһыл көмүс уонна икки үрүҥ көмүс мэтээли аҕалбыттара.
Турнирга кыттар хамаандалар: Россия, Венгрия, Словакия, Белоруссия, Австралия, Македония, Польша, Казахстан, Узбекистан, Турция, Румыния, Куба уонна Украина. Спортсменнартан ПЦР анаалыстара уонна вакцинация сертификаттара ирдэниэхтэрэ.
Саха сирин сүүмэрдэммит хамаандата «Манньыаттаах» лааҕырга, Алдаҥҥа, Владикавказка сбордары аастылар, өрөспүүбүлүкэ сүрүн хамаандатын тустууктара бары кытталлара былааннанар.
Кыайыылаахтар — 3000 дуоллары, үрүҥ көмүс призердар — 2000, боруонсалар — 1000 ылыахтара.
