24 Ыам ыйа 24.05
  • -7°
  • $ 104,68
  • 115,6

Чапчылҕаҥҥа хаарбах дьиэттэн көһөрүү бырагырааманан бастакы эбийиэк үлэҕэ киирдэ

13:01, 17 декабря 2021
Текст:

Чапчылҕан нэһилиэгэр хаарбах туруктаах дьиэттэн көһөрүү федеральнай бырагырааманан үс мэндиэмэннээх 19 кыбартыыралаах саҥа таас дьиэ үлэҕэ киирэн, олохтоохтор күлүүстэрин туттулар. Дьиэни Святослав Чикачев генеральнай дириэктэрдээх «ЯДК» ХЭТ, Василий Пинигин салайааччылаах «Электромонтаж» тутуу хампаанньата кэмигэр тутан түмүктээтилэр.

Чапчылҕан нэһилиэгин баһылыга Дьулустан Юшков бэлиэтииринэн, хаарбах дьиэттэн көһөрүү бырагырааматынан бастакы дьиэ үлэҕэ киирэн, бүгүн улахан бэлиэ түгэн буолла. Нэһилиэккэ билигин уонтан тахса хаарбах дьиэ баарыттан сэттэтэ реестргэ киирэн турар. Аны алта дьиэни учуокка ылыыга үлэ барар. Бу күн нэһилиэк ытыктанар киһитэ, сэрии сылын оҕото, улууска биллэр рационализатор Владимир Иванович Куликов дьиэ кэргэнинээн, педагогическай үлэ бэтэрээнэ Наталья Романовна Алексеева, элбэх оҕолоох дьиэ кэргэн ийэтэ Инга Ивановна Тризна онтон да атыттар сырдык, сылаас, ыраас дьиэҕэ киирдилэр.

«Толору хааччыллыылаах, билиитэ оһохтоох, уу сылытар тэриллээх олус үчүгэй тутуулаах, эргэ дьиэбит сөп түбэһэр иэннээх бэлэм саҥа кыбартыыраҕа тугу да эбии төлөөбөккө киирбиппититтэн олус астынныбыт, үөрдүбүт. Бу дьиэҕэ бэһиэ буолан олоруохпут. Нэһилиэкпит баһылыга Дьулустан Авксентьевич көмөтүнэн 16 саастаах инбэлиит сиэммэр анаан электричество уотун көмөтүнэн үөһэ тахсар — түһэр тэрили оҥорбуттарыгар уонна дьиэ тутуутун ыыппыт дьоҥҥо барыларыгар улахан истиҥ махталбын тириэрдэбин», — диэн этэр саҥа дьиэ олохтооҕо Марфа Александровна Соломонова.

Амма улууһугар буолбут үөрүүлээх тэрээһини алгысчыт Степан Нестеров арыалдьыт кыргыттарын уонна уолаттарын кытта арыйда. Улуус баһылыга Николай Архипов, баһылыгы тутууга уонна инфраструктураны сайыннарыыга солбуйааччы Виктор Смирников, Чапчылҕан баһылыга Дьулустан Юшков, тутууну ыыппыт «ЯДК» тэрилтэ салайааччыта Сергей Никитин, учаастак начаалынньыгынан үлэлээбит Василий Пинигин, тутааччылар онтон да атыттар кытыннылар.

Ааптар: Алтана Артемьева, «Амма олоҕо» хаһыат

Следите за самым важным и интересным в Telegram-канале и WhatsApp-группе ЯСИА
0
0