Саха сиригэр бу нэдиэлэҕэ халлаан туругун хоту циклон атмосфернай фроннара быһаарыахтара. Синоптиктар хас да оройуоҥҥа ардах, этиҥ уонна күүстээх тыал түһүө диэн сабаҕалыыллар, ону тэҥэ салгын температурата +30 кыраадыска диэри итийиэ.
Күн-дьыл туругун туһунан СИА-ҕа Саха сиринээҕи гидрометеорология уонна тулалыыр эйгэни кэтээн көрөр управление (УГМС) метеорологическай уонна агрометеорологическай борогунуос салаатын начаалынньыга Саргылана Никитина иһитиннэрдэ.
«Бэнидиэльниккэ хоту циклон ааһыытын кытта хотугулуу-илиҥҥи уонна киин оройуоннарга быстах ардах түспүтэ, оттон түүн илин эҥэргэ уонна Уус Маайа оройуоннарыгар сөҥүү түспүтэ. Нэдиэлэ устата халлаан туругун хотуттан соҕуруулуу-илин диэки сыҕарыйар атмосфернай фроннар сериялара быһаарыахтара. Онон хоту, хотугулуу-илиҥҥи, онтон нэдиэлэ бүтүүтэ — киин уонна соҕуруулуу-арҕаа оройуоннарга ардах, сорох сирдэргэ этиҥнээх уонна күүстээх тыаллаах», — диэн Саргылана Никитина кэпсээтэ.
Чугастааҕы сууккаҕа тымныы фронт ааһыытын кытта Халыма-Индигир оройуоннарыгар ардах, сорох сирдэригэр күүстээх. Хотуулуу-илин температура 8–13 кыраадыс намтыа, хайаларга инчэҕэй хаар түһүө.
Өрөспүүбүлүкэ киинигэр сэрэдэҕэ температура намтыа — +18…+23 кыраадыска диэри. Тыаллаах буолуо, Дьокуускайга үксүн сөҥүүтэ суох, арҕааттан тыал 9–14 м/с түргэннээх, күнүс температура +20…+22 кыраадыс. Оптуорунньукка киин куораппытыгар эмиэ сөҥүү суох, салгын температурата +25…+27 кыраадыска диэри тахсыа.
Туймаада Ыһыаҕын күннэригэр хайдах халлаан буолуой?
Синоптик этэринэн, Туймаада Ыһыаҕын кэмигэр чопчу күн-дьыл билгэтин оҥорор билигин уустук, ол гынан баран барыллаан ардах түһэрэ күүтүллэр. «Бээтинсэҕэ Дьокуускайга күнүс быстах ардахтаах, этиҥнээх, соҕурууттан тыаллаах, 3–8 м/с. Ити эрээри куйаас буолуо — +26…+28 кыраадыска диэри. Субуотаҕа уонна баскыһыанньаҕа чопчу биллэрии суох, схема биир кэмнээх буолбатах. Барыллаан эттэххэ, субуотаҕа уонна баскыһыанньаҕа ардахтаах күн-дьыл буолуо диэн сабаҕалыыбыт», — диэн Саргылана Никитина эбэн эттэ.
