Уус- Алдан улууһугар Саха сирин норуоттарын VIII оонньууларыгар бэлэмнэнии барар. Өрөспүүбүлүкэ баһылыга Айсен Николаев «Россия 24» ханаалга «Быһа кэпсэтии» биэрии кэмигэр эппитинэн, улуус олохтоммут болдьоххо оонньууну ыытар кыахтааҕын биллэрдэ, диэн СИА иһитиннэрэр.
Уус-Алдан улууһа Саха сирин норуоттарын VIII оонньууларыгар бэлэм үлэтин күүстээхтик ыытар.
«Спортивнай объектар тутуллаллар, биллэн турар, кыһалҕата суох буолбатахтар. Ол гынан баран, Уус-Алдан оройуона олохтоммут болдьоххо оонньуулары чуолкайдык ылынар кыахтаах. Онон, от ыйын 4 күнүгэр оонньуу арыллыыта буолуоҕа», — диэтэ Айсен Николаев.
Спортивнай тэрээһин буолаары турдаҕына Бороҕоҥҥо В.В. Никифоров-Күлүмнүүр аатынан култуура саҥа дыбарыаһа арыллыбыта олус суолталааҕын бэлиэтээтэ. Кэнники сылларга оройуоҥҥа барыта 30 социальнай объект тутулунна.
Бэлиэтээн эттэххэ, Саха сирин норуоттарын VIII спортивнай оонньуулара Бороҕон, Мындааба, Сыырдаах уонна Чараҥ нэһилиэктэригэр ыытыллыахтара.
Уус- Алдан улууһугар түөрт спортивнай объект тутуллар: Бороҕоҥҥо сүүрэр дорожкалаах 1000 миэстэлээх стадион, трибунатыгар 1124 миэстэлээх ипподром, Мындаабаҕа 32 миэстэлээх уопсай дьиэлээх спортивнай комплекс. Ону тэҥэ сыл бүтүөр диэри оройуон киинигэр, элбэх хайысхалаах чэбдигирдэр- спортивнай комплекс үлэҕэ киирэрэ былааннанар.
