Дьааҥы улууһун Бытантай үрэх үрдүгэр турар балык бултаах Эҥэ нэhилиэгэр быйыл СППСК «Яна Продукт» үүт, балык сыаҕын үлэҕэ киллэрэн, дьон үөрүүтэ улаатта.
Маастар-приемщик Тамара Бурцева: «СППСК «Яна Продукт» сыах арыйан, үлэ миэстэтин таhаарда, үүттэн оҥорор бородууксуйабыт нэhилиэнньэҕэ хамаҕатык барар. Ынах-сүөhү элбэҕэ буоллар, өссө элбэх бородууксуйаны таhаарыа этибит». СППСК «Яна Продукт» өр сылларга туруорсубут боппуруостарын олоххо киллэрэн, сибиэһэй балыктан бастакы ыыһаммыт (копченай) чыыр балыга Верхоянскай оройуонун нэhилиэктэригэр атыыга тахсан, атыылаhааччы сэҥээриитин ылла.
Эҥэ нэhилиэгиттэн балык бородууксуйатын аҕаларга, кыhыҥҥы суол туруор диэри, уустуктардаах да буоллар, тэрилтэ үлэhитэ Слепцов Сергей Васильевич уу мотуорунан, массыынанан сылдьан нэhилиэктэргэ тиэрдитэлээтэ.
Үллэр үүттээх, сүөгэйдээх, аллар арыылаах Дьааҥы оройуонугар төрүт ас дэлэгэйин ыраахтан-чугастан сылдьар дьон ордук сэргээн: «Үүт ас арааhа, ыыhаммыт балык маанылааҕа баар эбит!», — диэн сөҕө хайгыыллар.
СППСК «Яна Продукт» тэрилтэтэ (дириэктэр В. Х. Чириков) улуус киинин, нэhилиэктэри үүт, балык астарынан хааччыйан — төрүт саха иҥэмтэлээх аhа дэлэйэр.
Дьааҥы улууһун Адыаччы, Табалаах, Боруулаах нэhилиэктэригэр СППСК «Яна Продукт» үүт сыахтарын тэрийэн, улуус кефир, суорат, сүөгэй, йогурт, арыы, иэдьэгэй астарынан хааччыллар.
«Инникитин балык, эт бородууксуйаларын ыыһыыр сыаҕы улуус киинигэр оҥорор былааннаахпыт«, — диэн СППСК «Яна Продукт» дириэктэрэ Владимир Христофорович сырдатта.
