Саха Өрөспүүбүлүкэтэ Беларусь техникатын хоту дойду усулуобуйатыгар тургутар полигон буоларга бэлэм. Бу туһунан Ил Дархан Айсен Николаев «Иннопром. Беларусь» быыстапкаҕа иһитиннэрдэ, суруйар ТАСС.
«Мин бу олус суолталаах дии саныыбын — уопсай туттууга анаммыт кииннэр. Холобур, хоту дойду усулуобуйатыгар техниканы тургутар полигоннар. <…> Саха сирэ маннык киин буоларга бэлэм, Беларусь улахан бырамыысыланнай тэрилтэлэрэ биһиэхэ, биһиги усулуобуйабытыгар, техникаларын тургуталларыгар», — диэтэ Николаев.
Кини этэринэн, тургутуу кэнниттэн техника Саха сирин эрэ тэрилтэлэригэр буолбакка, Арассыыйа атын эрэгийиэннэригэр эмиэ тиэрдиллиэн сөп.
Өрөспүүбүлүкэ баһылыга эрэгийиэн сиригэр-уотугар олоххо киирэр ханнык баҕарар инфраструктура уонна бырамыысыланнас бөдөҥ бырайыактарыгар Беларусь тэрилтэлэригэр миэстэ баарын бэлиэтээтэ.
Эрдэ Саха Өрөспүүбүлүкэтин бырабыыталыстыбатын пресс-сулууспата эрэгийиэн уонна Беларусь өрөспүүбүлүкэтин икки ардыларыгар 2028 сылга диэри тыйыс кыһын усулуобуйатыгар анаммыт Беларусь техникатын тиэрдиигэ сөбүлэҥҥэ кэлбиттэрин иһитиннэрбитэ.
