Соторутааҕыта Уус Алдан улууһун дьаһалтатыгар туһалаах сэминээр буолан ааста. Ол курдук, бу улуус сиригэр-уотугар хагдаҥ эһэ ахсаанын сүрүннээһин боппуруоһун дьүүллэстилэр, суруйда Саха сирэ саайт.
Тэрээһини улуус баһылыга Василий Петрович Алексеев иилээн-саҕалаан ыытта. Улуус баһылыгын бастакы солбуйааччы Семен Бурнашев, СӨ Экологияҕа, айылҕаны туһаныыга уонна ойуур хаһаайыстыбатыгар министиэристибэтин Уус Алданнааҕы экологияны судаарыстыбанан кэтээн көрүүгэ иниспиэксийэтин салайааччытын эбээһинэһин быстах кэмҥэ толорооччута Нюргун Охлопков уо.д.а. кытыннылар. Улуус 21 нэһилиэгин баһылыга бары ыҥырыллан, сырыттылар.
— Сэминээрбит сүрүн сыалынан тыатааҕы дьоҥҥо-сэргэҕэ суоһууруттан нэһилиэнньэҕэ сэрэтэр үлэни күүһүрдэргэ уурулунна. Сыбаалкаларга, кыраныыссаларга ас тобоҕун эҥин мээнэ куппаттарыгар сүбэлэннэ. Адьырҕаны көрөр түгэннэригэр ЕДДС-ка, ИДьМ салаатыгар, Охотнадзордарга, тустаах иниспиэксийэҕэ биллэриэхтээхтэр. Улууспутугар бу кыыл ахсаанын сүрүннээһиҥҥэ болҕомто ууруллубута. Онон нэһилиэктэргэ биригээдэлэр тэриллибиттэрэ көдьүүстээх буолла. Быйыл ахсаанын сүрүннээһининэн булчуттар тоҕуһу уонна любительскай көҥүлүнэн үһү бултаабыттара. Онон нэһилиэктэр баһылыктара олохтоохтор тыаҕа, сиргэ-уокка сэрэхтээх буолалларыгар болҕомтону күүскэ ууруохтаахтара этилиннэ, — диэтэ Нюргун Охлопков.
