Арассыыйаҕа ийэ аатынан аҕа аатын биэрэр бобуу суох, ол эрэн ЗАГС-ка эр киһи аатыттан үөскэтиллибит эрэ киэбинэн ылаллар. Бу туһунан юрист Тимур Маршани этиилэригэр сигэнэн, РИА Новости иһитиннэрэр.
Кини быһаарбытынан, Марьевнаны эбэтэр Евгеньевнаны регистрациялыахтара, тоҕо диэтэххэ Марий уонна Евгений диэн эр киһи ааттара бааллар. Оттон Ларисовнаны, бука, аккаастыахтара.
Юрист этэринэн, АБ Дьиэ кэргэн куодаксатын 58 ыстатыйата оҕоҕо суруллар аҕа аатын төрөппүт аҕатын аатыгар ситимниир, ол эрэн эрэгийиэннээҕи сокуоннарынан уонна национальнай үгэстэринэн быһаарыллар чэпчэтиилэр бааллар. Онон аҕа аата хаан аҕатын аатыттан эрэ буолбакка, эһэтин эбэтэр ханнык баҕарар атын эр киһи аатыттан үөскэтиллиэн сөп.
Өскөтүн дьиэ кэргэҥҥэ үгэс быһыытынан аҕа аатын биэрбэт буоллахтарына, оҕону аҕа аата суох суруйтарыахха сөп. Ону тэҥэ, ийэ аҕа туһунан сибидиэнньэни эппэтэх буоллаҕына, сокуон оҕоҕо аҕа аатын ийэ талыытынан суруйарга көҥүл биэрэр, — диэн Маршани бэлиэтээтэ.
