2027 сылга быстах кэмҥэ үлэлээбэт буолуу, хат буолуу уонна төрөөһүн, ону тэҥэ оҕону көрүү ыйдааҕы босуобуйаларын муҥутуур төлөбүрдэрэ улаатыахтара. Босуобуйалар үрдээһиннэрэ Араассыыйатаҕы Социальнай пуонда бүддьүөтүн бырайыагар киирэр. Бырайыагы балаҕан ыйын 30 күнүгэр бырабыытылыстыба Судаарыстыбыннай Думаҕа киллэрдэ.
“2023 сылтан биир кэлим тарыыбы кытта киллэриллибит страховой усунуос баазата сыллата үрдээһинэ, үлэһит дьон быстах кэмҥэ үлэлиир кыаҕа суох буолууларынан уонна ийэ буолууга ылар төлөбүрдэрин суумата сыл ахсын улаатар. Ол курдук, 2027 сылга хат буолуу уонна төрөөһүн босуобуйаларын муҥутуур төлөбүрдэрэ 1,1 мөл. солкуобайы ааһыаҕа”, – диэн АБ Үлэ уонна социальнай көмүскэл миниистирэ Антон Котяков иһитиннэрдэ.
Босуобуйалар төлөбүрдэрэ, страховой кэм буолуон иннинээҕи икки халандаарынай сылын орто хамнаһыттан ааҕыллар. Хат буолуу уонна төрөөһүн босуобуйата үлэлиир дьахтар орто хамнаһыттан 100% тэҥнэһэр. Муҥутуур төлөбүр кэмигэр төрөөһүҥҥэ уонна 140 халандаарынай күн уоппускалаах буоллаҕына, 2026 сылга 955,8 тыһ. солкуобайтан 2027 сылга 1,1 мөл. солкуобайга диэри үрдүөҕэ. Үлэһит киһи оҕону көрүү уоппуската 2027 сылга саҕаланнаҕына, ыйдааҕы босуобуйа муҥутуур төлөбүрэ 2026 сыллаахха көрүллүбүт 83 тыһ. солкуобайтан 95,5 тыһ. солкуобай кэриҥэр тэҥнэһиэҕэ. Быстах кэмҥэ үлэлиир кыаҕа суох буолуу босуобуйата страховой ыстаастан тутулуктаах: 5 сылга диэри – 60% орто хамнаһыттан, 5-8 диэри – 80% уонна 8 сылтан элбэх буоллаҕына 100% тэҥнэһэр. Быстах кэмҥэ үлэлиир кыаҕа суох буолуу муҥутуур төлөбүрэ 8 уонна онтон үрдүк ыстаастаахха 2026 сылга 207,6 тыһ. солкуобайтан 2027 сылга ыйга 239 тыһ. солкуобайга диэри улаатыаҕа.
2027 сылга Арассыыйатааҕы Социальльнай пуонда быстах кэмҥэ үлэлиир кыаҕа суох уонна ийэ буолуутунан сибээстээн босуобуйаны төлөөһүҥҥэ 1,6 трлн. солкуобай кэриҥэ ыытар былааннаах.
Тылбаас: Слепцова Саргылана
