Саха сирин баһылыга Айсен Николаев Минскэйгэ үлэлиир сырыытын кэмигэр Беларусь салалтатын кытары хас да көрсүһүүнү ыытта. Бу туһунан кини МАХ ханаалыгар суруйда.
Беларусь үбүн миниистирин солбуйааччы Александр Суднигы кытта алмаас эйгэтигэр, кырыылааһыҥҥа уонна ювелирнай бырамыысыланнаһы сайыннарыыга бииргэ үлэлэһии, ону тэҥэ Саха сирин уонна Беларусь тэрилтэлэрэ бу хайысхаларга салгыы хайдах үлэлиэхтэрин сөбүн туһунан кэпсэттилэр.
«Беларусь Национальнай олимпийскай кэмитиэтин бэрэсидьиэнэ Виктор Лукашенколыын өссө биирдэ көрсөн үөрдүм. Дьокуускайга ыытыллыбыт «Азия оҕолоро» оонньууларын ахтан-санаан ыллыбыт, онно Беларусь хамаандата чаҕылхайдык кыттан, 78 мэтээли ылбыта. Салгыы успуорка сибээстэри бөҕөргөтүөхпүт, бииргэ эрчиллэр тэрээһиннэри уонна күрэхтэһиилэри ыытыахпыт, успуорт федерацияларын уонна тириэньэрдэр икки ардыларыгар бииргэ үлэлэһиини сайыннарыахпыт», — диэн Айсен Николаев суруйда.
Маны таһынан, Саха сирин баһылыга «Беларусьфильм» диэн национальнай киинэ устуудьуйатыгар сылдьан, киинэни оҥорон таһаарыы толору циклин, павильоннар уонна тиэхиньиичэскэй инфраструктура үлэлэрин кытта билистэ. Кини этэринэн, бу уопут Саха сирин киинэ индустриятын сайыннарарга ордук интэриэһинэй.
“»Сахафильм» уонна «Беларусьфильм» бииргэ үлэлэһии туһунан сөбүлэҥҥэ илии баттаатылар, докумуон чэрчитинэн бииргэ киинэ устууну саҕалыахтара”, — диэн Айсен Николаев бэлиэтээтэ.
