АЛРОСА Саха сирин оҥорон таһаарааччыларын кытта сибээһин салгыы бөҕөргөтөр уонна олохтоох бородууксуйаны атыылаһыы саҥа хайысхаларын көрөр. Бииргэ үлэлэһиини кэҥэтии АЛРОСА генеральнай дириэктэрэ Павел Маринычев сорудаҕынан, олохтоох аграрийдары өйүүр сыалтан ыытыллар.
2024 сылга хампаанньа 34,8 мөлүйүөн солкуобай суумалаах тыа хаһаайыстыбатын бородууксуйатын атыыласпыт, оттон 2025 сылга — номнуо 42,7 мөлүйүөнү. Быйыл атыылаһыы кээмэйин 44,1 мөлүйүөн солкуобайга диэри улаатыннарар былааннаах. Алмааһы хостуур хампаанньа бииргэ үлэлэһиини салгыыр былаанын балаҕан ыйын 25 күнүгэр Дьокуускайга буолбут «Сила села» форумҥа биллэрдэ.
Форум кэмигэр олохтоох оҥорон таһаарааччылар «АЛРОСА-торг» бэрэстэбиитэлин кытта кэпсэттилэр — бу Мииринэй оройуонугар уонна Накыын баахта бөһүөлэгэр үлэһиттэр аһылыктарын тэрийиигэ эппиэттиир хампаанньа салаата. Пиэрмэрдэр бэйэлэрин ыйытыыларыгар хоруйдары ыллылар, ону тэҥэ хампаанньа наадатыгар бородууксуйаны атыылаһыы систиэмэтэ хайдах үлэлиирин биллилэр.
«Биһиги остолобуойдарбытыгар эт, балык, отон уонна өрөспүүбүлүкэ агропромышленнай комплексын атын да бородууксуйаларын тиһигин быспакка аҕалан биэриигэ эрэнэбит, — диэн «АЛРОСА-торг» генеральнай дириэктэрэ Константин Бруевич бэлиэтээтэ. — Форум түмүгүнэн боруобалыыр баартыйаларга сайаапкалары оҥорон бүтэрдибит. Бу бородууксуйа хаачыстыбатын сыаналыырга уонна Саха сирин тиэрдээччилэрин кытта салгыы систиэмэлээх үлэни торумнуурга кыаҕы биэриэҕэ».
