23 От ыйа 23.07
  • 17°
  • $ 87,78
  • 95,76

VII сайыҥҥы «Азия оҕолорун» оонньуулара 2022 сылга Владивостокка буолуохтара

17:05, 14 октября 2021
Текст:
Читайте нас на
Яндекс Новости
ЯДВ

Норуоттар икки ардыларынааҕы «Азия оҕолорун» оонньууларын комитетын президенэ Владимир Максимов уонна Приморскай кыраай губернатора Олег Кожемяко 2022 сылга VII сайыҥҥы «Азия оҕолорун» оонньууларын тэрийэргэ илии баттастылар. Тэрээһини эһиил от ыйын 27-тэн атырдьах ыйын 8-гар диэри былааннаатылар. Владивостокка буолар «Азия оҕолоругар»спорт 19 көрүҥэр мэтээл оонньонуо.

«VII сайыҥҥы «Азия оҕолорун» оонньууларын 2022 сылга Владивостокка тэрийэр оруннаах. Куорат маннык хабааннаах тэрээһини ыытарга бэлэм», — диэн Олег Кожемяко чуолаан бэлиэтээтэ. Приморскай кыраай билиҥҥи туругунан, Уһук Илин уокурук ордук сайдыылаах регионунан биллэр. Манна спортивнай эрэ күрэхтэһиилэри буолбакка, дойду араас хабааннаах тэрээһиннэрин тэрийэ үөрүйэхтэр.

Урут күрэхтэһээччилэр Норуоттар икки ардыларынааҕы «Азия оҕолорун» оонньууларыгар спорт 17 көрүҥэр киирсэллэрэ. Быйыл тэрийээччилэр, бадминтону уонна брейк үҥкүүтүн эбэн биэрдилэр. Маны таһынан, «харбааһын» көрүҥүн кэҥэтэн, “ыраас ууга харбааһын” диэн баар буолла,  уонна «спортивнай тустууга” « гректии-римнии» тустууну киллэрдилэр.

Онон Владивостокка буолар «Азия оҕолоругар» барыта 19 көрүҥҥэ мэтээл оонньонуо: бадминтон, баскетбол(баскетбол 3*3), кураш тустуу, хапсаҕай, бокс, волейбол (пляжнай волейбол), дзюдо, чэпчэки атлетика, мас-рестлинг, остуол тенниһэ, харбааһын (ыраас ууга харбааһын), буулдьанан ытыы, самбо, спортивнай хаамыы, спортивнай тустуу (көҥүл тустуу, гректии-римнии тустуу), ох саанан ытыы, спортивнай үҥкүү (брейк), тхэквондо, мини-футбол (футзал), художественнай гимнастика. Күрэхтэһиилэри Владивосток уонна Артём куораттар 10 араас спортивнай площадкаларыгар тэрийиэхтэрэ. Бу площадкалар ирдэбилгэ толору эппиэттииллэр.

Күрэхтэһээччилэри барыларын «Океан» оҕо сынньанар киинигэр түһэриэхтэрэ, аһатыахтара. Манна оҕолор эрчиллэллэрин быыһыгар бэйэ-бэйэлэрин кытары билсиэхтэрэ, култуураларын кэҥэтиэхтэрэ. Тренердары, судьуйалары уонна волонтёрдары Уһук Илин Федеральнай университет кампуһугар олордуохтара. Кинилэргэ анаан эмиэ экскурсиялар, араас мастер-класстар, тэрээһиннэр ыыттыллыахтара.

Приморскай кыраайга ыытыллыахтаах оонньуулар үрдүк таһымнаахтык ааһыахтара диэн Олег Кожемяко эрэннэрдэ.

«Эһиил Владивостокка буолар «Азия оҕолоро» чаҕылхайдык ааһыахтара диэн бигэ эрэллээхпин. Тэрээһин манна буолара оҕо спорда сайдарыгар көх буолуоҕа», — диэн «Азия оҕолорун» тэрийэр бөлөҕүн президенэ Владимир Максимов бэлиэтээтэ.

Былаан быһыытынан VII сайыҥҥы «Азия оҕолорун» оонньуулара 2020 сыллаахха Монголияҕа буолуохтаах этилэр, ол эрээри бу дойду маннык таһымнаах күрэхтэһиини сатаан тэрийбэтин биллэрбитэ.

Манна даҕатан эттэххэ, Саха сирин Ил Дархана Айсен Николаев 2024 сыллааҕы оонньууну Дьокуускайга ыытар туһунан этии киллэрбитэ.

Следите за самым важным и интересным в Telegram-канале и WhatsApp-группе ЯСИА