Дьокуускай 202 микрооройуонугар Роман Дмитриев аатынан бөҕөргөтүүлээх кытыл оҥоһуллуоҕа. Ол туһунан кулун тутар 7 күнүгэр киниэхэ анаммыт тэрээһиҥҥэ этилиннэ. Бу күн көҥүл тустууга олимпийскай чемпион, ССРС хас да төгүллээх чемпиона, аан дойду уонна Европа чемпиона, ССРС спордун үтүөлээх маастара 72 сааһын туолуохтаах этэ. Өрөспүүбүлүкэ уонна куорат салалталара, доҕотторо, аймахтара, биир дойдулаахтара улуу спортсмеҥҥа өйдөбүнньүк күнүн тэрийдилэр, СИА суруйар.
«Кини аата спорт эрэ эйгэтигэр буолбакка, бүтүн дойду историятын летопиһыгар кыһыл көмүс буукубанан суруллар. Роман Михайлович олимпийскай чемпион уонна легендарнай спортсмен эрэ буолбатах, кинини амарах аҕа, кыһамньылаах киһи уонна эрэллээх доҕор, биллиилээх судаарыстыбаннай деятель быһыытынан билэбит», — диэн бэлиэтээтэ спорт миниистирэ Иннокентий Григорьев.
Өрөспүүбүлүкэ уонна куорат салалталара, доҕотторо, аймахтара, биир дойдулаахтара Хомсомуол болуоссатыгар улуу спортсмеҥҥа анаммыт пааматынньыкка сибэкки уурдулар.
«202 микрооройуоҥҥа Роман Михайлович Дмитриев аатынан бөҕөргөтүллүбүт кытылы оҥорорго былаанныыбыт. 2024 сылга бырайыак олоххо киирэригэр сыал туруорулунна. Эдэр көлүөнэ биир дойдулаахтарын улуу дьыалаларын умнубат. Биһиги оҕолорбут бу пааматынньык таһыгар туран «Бу кимий?» диэн ыйыттахтарына, биһиги киэн тутта Саха сирин, норуотун аан дойдуга аатырдыбыт, сураҕырдыбыт, өрөспүүбүлүкэ сайдыытыгар элбэх кылаатын киллэрсибит киһи, биһиги кинини умнубаппыт уонна кини туһунан өйдөбүлү харыстыыбыт диэн этиэх тустаахпыт», — диэтэ Дьокуускай куорат баһылыгын э.т. Евгений Григорьев.
Тэрээһиҥҥэ Роман Дмитриев кыыһа Марина Крылова, депутат, Олимпийскай чемпион Павел Пинигин, 1976 сыллааҕы Олимпийскай оонньуулар үрүҥ көмүс призердара Александр Иванов, Конституционнай суут бэрэссэдээтэлэ Александр Ким-Кимэн уонна да атыттар кыттыыны ыллылар.
«Кини билигин биһиги аттыбытыгар баара буоллар өрөспүүбүлүкэ уонна спорт сайдыытыгар өссө элбэх кылааты киллэрбит буолуохтаах этэ…», — диэтэ Павел Пинигин.
