29 Кулун тутар 29.03
  • -15°
  • $ 92,26
  • 99,71

Уус Алдан Бороҕонугар Александр Лыткин оҕолорго үтүө холобур буолар

17:17, 03 июня 2016
Текст:
Читайте нас на
Яндекс Новости
ЯДВ

Эбии үөрэхтээһин эйгэтигэр 30-ча сыл үлэлээбит Александр Лыткин бу уонча сылтан бэттэх өссө биир ураты суолу баһылаата. Талааннаах киһи уран тарбахтарыгар сытыы кыптыый тутан кумааҕы кырыйар идэлэннэ.


«Кумааҕынан кырыйыы эмиэ олус умсугутуулаах дьарык. Тугу баҕарар кырыйан, олоҕу, айылҕаны дьүһүйүөххэ, хоһуйуохха сөп. Кыптыыйы ылан кырыйан бардахха, бэйэтэ ис-иһиттэн арыллан иһэр. Дьиктитэ диэн, киһи доруобуйатыгар эмиэ туһалыыр ээ. Мин билигин сүрүн үлэм таһынан улуустааҕы реабилитационнай кииҥҥэ куруһуоктаахпын. Оҕолор кумааҕынан кырыйыыны сөбүлүүллэр, интэриэһиргииллэр«, — диэн кэпсиир кини.

Уһуйааччыга төрдүс кылаастан дьарыктаммыт Айаал Бурнашев быйыл оскуоланы бүтэрэр. Кини Александр Платонович биир саамай киэн туттар иитиллээччитэ. Бастаан утаа ылсалларыгар уустугун, уол төрүөҕүттэн доруобуйатынан аһаах буолан, кыптыыйы тутара да кыаллыбатын кэпсиир. Онон бэрт кыраттан саҕалаан, бастакы дьарыктарыгар тарбахтарын сайыннаран, пластилины имитэн, ону-маны оҥорон, сыыйа дьэ кырыйыыга көспүттэр.

«Билигин үөрэнээччим элбэх доҕордонно, табаарыстанна, ону ааһан айар быыстапкаларга ситиһиилээхтик кытынна, авиатехника көрүүтүгэр кини модела улууска иккис миэстэни ылан турар. Мүрү оскуолатын үбүлүөйдээх сылыгар «Сүүс бастыҥ үөрэнээччи» иһигэр киирбитэ», — диэн кини киэн тутта кэпсиир.

Александр Платонович Лыткин «Кумааҕынан пластика» диэн куруһуогун иитиллээччилэрэ улуустааҕы көрүүлэргэ, быыстапкаларга бастыыллар. Оттон педагог тус бэйэтэ бу дьарыгар авторскай семинары уонна маастар-кылаастары ыытар.

Уһуйааччы быһыытынан Александр Платонович оҕо ис дьоҕурун арыйар ураты суоллаах, оттон биир идэлээхтэригэр, кэлиэгэлэригэр эйэҕэһэ, элэккэйэ, бары уопсастыбаннай үлэҕэ кыттыһан иһэрэ мээнэ киһиэхэ бэриллибэт ээ. Кини араас тэрээһин бары киэргэтиитин ыпсаран оҥорууга солбуллубат маастар. Этиэххэ эрэ кэрэх, сүүрэн-көтөн, тупсаҕайдык бүтэрбитэ-оһорбута эрэ баар буолар. Аны туран, Бороҕоннооҕу култуура киинин иһинэн дьоҕус театрга сылдьан, көрдөөх-нардаах артыыс быһыытынан эмиэ биллэр.

Следите за самым важным и интересным в Telegram-канале и WhatsApp-группе ЯСИА