Уус Алдаҥҥа кэлиҥҥи сылларга суоппар дастабырыанньатын ылыыга эксээмэни туттарарга анал ирдэбиллэргэ эппиэттиир компьютернай кылаас уонна автодром суоҕа эрэйи үөскэтэ сылдьыбыта.
Бу кыһалҕаны туоратар туһуттан улуус дьаһалтатын баһылыга Алексей Федотов Суолга сэрэхтээх буолуу судаарыстыбаннай инспекциятын улуустааҕы салаата компьютернай кылаас кэмпилиэгин атыылаһарыгар уонна Уус Алданнааҕы техникум автодромун саҥардан, тупсаран оҥорууга көмө үп көрөргө депутаттар улуустааҕы Сэбиэттэригэр этии киллэрбитэ.
Депутат Афанасий Колесов: “Улуус депутаттара Алексей Васильевич этиини өйөөн, уочараттаах сессиябытыгар ырытыһан бигэргэппиппит түмүгэр көмө үп ананан, компьютернай кылаас баар буолла, ону сэргэ автодром саҥа ирдэбиллэргэ толору эппиэттиир гына оҥоһулунна”, – диэн кэпсээтэ.
Онон билигин улуус олохтоохторо миэстэтигэр эксээмэни туттарар усулуобуйалара толору тэрилиннэ.
Суолга сэрэхтээх буолуу судаарыстыбаннай инспекциятын улуустааҕы салаатын салайааччыта Александр Сосин: «Соторутааҕыта депутаттарга транспоры ыытар быраабы ыларга теория эксээмэнин тутар саҥа компьютернай кылааспыт үлэтин уонна Суоттуга техникум автодромун көрдөрдүбүт. Автодром билиҥҥи ирдэбиллэргэ толору эппиэттиир гына тупсарыллан оҥоһуллан илин эҥэр улуустарга биир бастыҥ буолла. Онон олохтоохтор теория эксээмэнин улуус киинигэр Бороҕоҥҥо, оттон транспоры ыытыы тургутуутун Суотту нэһилиэгэр Уус Алданнааҕы техникум базатыгар туттараллар. Эбэн эттэхпинэ, техникум салалтатын кытары эксээмэни туттара тиийэр дьоҥҥо массыынаны ыытыыга эрчиллэр, аһыыр, хонор усулуобуйаларын хааччыйабыт«, – диэн кэпсэтиигэ кыттыста.
