Быйыл хоту уонна Арктика үгүс улуустарыгар кыһыҥҥы суол хойутаан аһыллан (сорохторго аһылла да илик), улахан уустуктары үөскэттэ. Бу күннэргэ Аллараа Халыма Андрюшкинотыгар кэтэһиилээх кыһыҥҥы суоллара оҥоһуллан, номнуо 29 тонна уматык тиэрдилиннэ. Сиһилии edersaas.ru ааҕыҥ.
«Сахаэнерго» уонна «Теплоэнергосервис» АУо-лар уматыгы тиэйиигэ бары күүстэрин ууран үлэлии олороллор.
Уус Куйга – Депутатскай хайысхатынан суол ыйыллыбыт кэмигэр аһыллыбакка, Депутатскай, Хайыр, Усуйаана, Хаһааччыйа, Тумат уонна Сайылык нэһилиэктэригэр уматыгынан хааччыллыыга балаһыанньа кытаатан, хочуолунайга кэмчилээһин эрэсиимэ олохтоммутун туһунан «Сахаэнерго» хампаанньа пресс-сулууспата иһитиннэрдэ.
Ахсынньыга энергетиктэр СӨ Нэһилиэнньэтин олоҕор-дьаһаҕар куттал суох буолуутун хааччыйыыга судаарыстыбаннай кэмитиэтигэр уонна СӨ Тырааныспарын уонна суол хаһаайыстыбатын министиэристибэтигэр кыһыҥҥы суолу оҥоруу үлэтин түргэтэтэр туһунан суругу суруйбуттара. Олунньу 2-3 күннэригэр Уус Куйгаттан уматыгы тиэммит колонна айаҥҥа турунуохтаах даҕаны, суол кыараҕас буолан, утары массыына кэлэр түгэнигэр сатаан аасыһыа суохтарын сөп. Аны хоту улуустарыгар тиэхиньикэ тиийбэт буолан, энергетиктэр уонна коммунальщиктар өрөспүүбүлүкэ бары улуустарыттан массыынаны наймылаһарга тиийдилэр.
Бүгүҥҥү туругунан, Сайылык сэлиэнньэтигэр – 92 тонна сиикэй ньиэп (13 сууккаҕа тиийэр), 60 тонна дизельнэй уматык (20 сууккаҕа), Хаһааччыйаҕа – 339 тонна сиикэй ньиэп (26 суукка), Тумакка – 201 тонна таас чох (25 суукка) саппааһа баар. Оттон Усуйаана сэлиэнньэтин ДЭС-гэр 10 сууккаҕа тиийэр 15 тонна дизельнэй уматык, Хайырга 15 сууккаҕа тиийэр 14 тонна уматык харалла сытар. Депутатскайга 30 сууккаҕа тиийэр 422 тонна дизельнэй уматык, 38 тонна ньиэп (60 суукка), 5414 тонна таас чох (50 суукка) хаалла.
