Ил Түмэн экэниэмикэ, инвестиция уонна бырамыысыланнас бэлиитикэтигэр сис кэмитиэтин мунньаҕар үс судаарыстыбаннай бырагыраамаҕа киирэр уларыйыылары бу ыйга көрдүлэр.
Сис кэмитиэт бэрэссэдээтэлэ Павел Петров Жатайга устар аалы оҥорор собуоту тутуу төһөлөспүтүн ыйыталаста. СӨ тырааныспарга уонна суол хаһаайыстыбатыгар миниистир Владимир Сивцев тутуу матырыйаалын сыаната ыараабыта уонна кирэдьиит бырыһыана үрдээбитэ бүддьүөккэ уларытыылары киллэрэргэ учуоттаммытыгар норуот дьокутааттарыгар махталын биллэрдэ. Бу сайын былаһааккаҕа 121 киһи, 9 тиэхиньикэ үлэлиир.
Ол эрэн тутар-таҥар үлэни салгыы ыытар кыах суоҕа этилиннэ. Бырайыагын уонна симиэтэтин докумуонуттан дьиҥ олоххо араастаһыы тахсан, тиэхиньиичэскэй эспэртиисэ кэлэн чинчийиэхтээх. Итиниэхэ олоҕуран бэрээдэги араҥаччылыыр уонна хонтуруоллуур уоргаҥҥа сайабылыанньа киирбит. Собуот 66% тутуллубут, оборудованиены атыылаһарга хантыраак оҥоһуллубут, улахан аҥаара төлөммүт, Дьокуускайга тиэрдиллибит, суруйда Саха парламент саайт.
