Ил Түмэн мунньаҕар парламент бэрэссэдээтэлин солбуйааччы Юрий Николаев Ил Дархан Айсен Николаев тыа сиригэр көрүллэр өйөбүллэри күүһүрдэри эппитин санатта. Онон бырабыыталыстыбанан тыа хаһаайыстыбатын сайдыытыгар судаарыстыбанай бырагырааманы үбүлээһиҥҥэ эбии 500 мөл солк көрүүгэ көннөрүүлэр киирдилэр.
2024 сыл бюджетыгар 1 кг үүккэ көрүллэр суума 65 солк, кэтэх хаһаайыстыбаларга ыанар ынах төбөтүгэр көрүллэр суума 39 тыһ солк (Арктикаҕа уонна бырамыысыланнас оройуоннарыгар 45 тыһ солк) буолла.
Маны сэргэ 500 мөл солк-тан өрөспүүбүлүкэ оҥорон таһаарар тэрилтэлэрин сөргүтүүгэ үбүлээһиҥҥэ туттуохтара. Ол курдук, гидромелиоративнай үлэлэргэ 50 мөл солк, оҕуруот аһын сылы эргиччи үүннэрээччилэргэ — 15 мөл солк, үүнээйи эбийиэктэрин тэрийиигэ уонна саҥардыыга, бурдук ыскылааттарын тутууга — 20 мөл солк, сүөһү сиир аһын бэлэмнээһиҥҥэ муниципальнай бырагыраамаларга эбии үбүлээһиҥҥэ — 75 мөл солк, үгэскэ кубулуйбут салаанан дьарыктанар хааһына тэрилтэлэригэр — 43 мөл солк, үгэскэ кубулуйбут сүөһү иитиитинэн дьарыктанааччыларга уонна саха сүөһүтүн иитээччилэргэ — 19 мөл солк уонна да атын хайысхаларга тыырылынна.
