Эдьигээҥҥэ интэриниэт үлэтэ Эдьигээн — Бааханай хайысханан магистральнай лииньийэ учаастагар хаабыл алдьанан хааччахтанна.
Алдьаныы баар сирэ ыраах, уустук суоллаах-иистээх буолан, саахалы туоратар-чөлүгэр түһэрэр үлэни атахтыыр.
Билигин Эдьигээнтэн уонна Бааханайтан саахалы туоратыыга икки биригээдэ үлэлии сылдьар. Үлэни күүһүрдээри бүгүн Дьокуускайтан эбии исписэлиистэр тиийдилэр.
Үлэ тохтоло суох күнүстэри-түүннэри ыытыллар. Хааччахтааһын кэмин муҥутуур кылгас оҥорорго уонна интэриниэт ситимин түргэнник чөлүгэр түһэрэргэ бары ирдэнэр миэрэлэр ылыллаллар.
Саха Өрөспүүбүлүкэтин инновацияҕа, сыыппара сайдыытыгар уонна инфокоммуникационнай технологияларга миниистирэ Пётр Николаев быһыыны-майгыны тус хонтуруолугар тутар.
Сибээс чөлүгэр түспүтүн туһунан эбии иһитиннэриэхтэрэ.
