Бу күннэргэ Уус Алдан улууһун Тулуна нэһилиэгэр 18х40 иэннээх спортивнай-оонньуур былаһаакка тутуута саҕаланыахтаах. Былаһаакканы оскуола территориятыгар тутарга былааннаабыттар.
«Хас биирдии киһи оҕо эрдэҕиттэн чөл туруктаах, эт-хаан өттүнэн чэгиэн-чэбдик буоларын ситиһэр сыалтан, нэһилиэкпитигэр оҕо спортивнай-оонньуур былаһааккатын тутан эрэбит. Бу күннэргэ сиэмэн кутан бэлэмниэхпит», – диэн нэһилиэк Уус Алдан улууһун Тулуна нэһилиэгин баһылыга Иннокентий Троев ЯСИА-ҕа кэпсээтэ.
Былырыын улуус иһигэр ыытыллыбыт комплекснай спартакиадаҕа үһүс миэстэ ыланнар, 150 тыһ. солкуобайдаах сертификатынан наҕараадаланан, онтуларынан нэһилиэнньэҕэ анаан тренажердары атыылаһан туруоруохтара. Онон ханнык баҕарар киһи күнүс, киэһэ да өттүгэр кэлэн эрчиллэр, дьарыктанар кыахтаныаҕа.
Урут нэһилиэк олохтоохторо кыһыҥҥы, сааскы өттүгэр оскуола спортивнай саалатыгар эрчиллэр буоллахтарына, сайыҥҥы өттүгэр аһаҕас халлааҥҥа дьарыктаныахтара.
Былаан быһыытынан былаһаакка аллараатыгар газон тэлгэтэн баран, олбуорун тимир сетканан эргитиэхтээхтэр итиэннэ тренажердары ууруохтаахтар.
