Туймаада ыһыаҕа Дьокуускайга түмүктэннэ. Икки күн устата, бэс ыйын 27 уонна 28 күннэригэр, тэрээһиҥҥэ 230 тыһыынчаттан тахса киһи сырытта. Бу кэнники сылларга биир саамай элбэх киһи кыттыбытынан ааҕыллар, диэн уокурук дьаһалтатыгар иһитиннэрдилэр.
Быйылгы бырааһынньык Арассыыйа норуоттарын сомоҕолоһууларын уонна Саха сиригэр Култуура сылларын бэлиэтинэн ааста. 20 былаһааккаҕа 100-тэн тахса тэрээһин ыытылынна. Ыалдьыттарга табыгастаах буоллун диэн Drivee хампаанньаттан босхо шаттллар уонна гольфкардар үлэлээтилэр. Ипподром өттүттэн «Илин Аартык» диэн эбии киирии аан маҥнайгытын арылынна, онно эмиэ ыраастаныы сиэрэ-туома ыытылынна.
Аһыллыы сиэригэр-туомугар уонунан тыһыынча көрөөччү муһунна. Театрализованнай туруорууга Дьокуускайтан 800-чэкэ киһи уонна 18 айар кэлэктиип кытынна.
Хаартыска: ЯСИА саайта
“Дыгын “оонньууларын” финала эмиэ олус элбэх киһини түмтэ. Бу ааттаах-суоллаах күрэхтэһиигэ аан бастаан Кэбээйи улууһуттан Артем Дьяконов кыайыылаах таҕыста. Иккис миэстэни Яков Дмитриев, үсүһү Павел Друзьянов ыллылар.
