Томпо оройуонун сиригэр бөрөлөр уонна эһэлэр таба уонна сылгы иитэр хаһаайыстыбаларга элбэх хоромньуну таһаараллар. Адьырҕалары утары булчуттар уонна хаһаайыстыбалар үлэһиттэрэ туруулаһаллар.
2024 сыл сэтинньи 12 күнүнээҕи туругунан, оройуон тыатын хаһаайыстыбалара таба, сылгы иитэр сиригэр 86 бөрө баара бэлиэтэнэр. Адьырҕалар сыл саҕаланыаҕыттан 422 дьиэ табатын уонна 32 сылгыны туттулар. Онон барыллаан тыа хаһаайыстыбатыгар 27 мөл 500 тыһ солкуобайдаах хоромньуну таһаардылар.
Сылын аайы адьырҕалар ахсааннара элбиир, хаһаайыстыбалар хоромньулара киллэринэр дохуоттарынааҕар улахан да курдук буолар.
Кыһалҕаны быһаарар инниттэн Томпотооҕу государственнай экологическай инспекцияны кытта дуогабар түһэрсэн, бөрөһүттэр биригээдэлэрэ тэриллибитэ. Николай Захаров салалтатынан булчуттар Александр Кривошапкин, Афанасий Колодезников, Василий Матаркин сонорго сылдьаллар. Эһэни бултаһарга Юрий Смельцовы кытта дуогабар түһэриллибитэ. Сылга оройуоҥҥа 20-тэн тахса бөрөнү уонна 10-тан тахса эһэни бултууллар.
Адьырҕалары бултаһарга оройуон дьаһалтата сылын аайы олохтоох бюджеттан 800 тыһыынча солкуобайы көрөр. Булчуттарга хас биирдии өлөрүллүбүт бөрө ахсын 10 тыһ. солк. эбии төлүүр. Бастыҥ сонордьуттарга бириэмийэ көрүллэр. Ол курдук сыл түмүгүнэн элбэх бөрөнү өлөрбүт үс булчукка эбии төлөбүр көрүллэр. Оройуон дотационнай буолан, онтон ордук кыаллыбат, оттон адьырҕалары суох гынарга үгүс үп барар.
Ааптар: Евдокия Неустроева
