Бүлүү улууһун баһылыгын бастакы солбуйааччы Василий Лукин, тыа хаhаайыстыбатын департаменын салайааччыта Иван Тарасов Чинэкэҕэ, Өкүндүгэ, Тааһаҕарга, Хампаҕа сылдьан, окко киирии хайдах саҕаланан эрэрин, сайыҥҥы үлэ-хамнас туругун, баар балаһыанньаны миэстэтигэр көрөн-истэн билистилэр.
Тааһаҕар нэһилиэгин дьаһалтатыгар нэһилиэк активын уонна тыа хаһаайыстыбатынан дьарыктанааччылары кытта көрсүһүүгэ тыа хаһаайыстыбатын департаменын салайааччыта Иван Тарасов улуус үрдүнэн 28 тыһ. тонна оту бэлэмнииргэ былаан тиэрдиллибитин, сир үлэтигэр федеральнай бырагырааманан сири оҥостууга үп-харчы көрүллүбүтүн, оборудованиены уонна техниканы булунууга харчы көрүллэр буолбутун, итинник бырагыраамаларга хайдах кыттыахха сөбүн быһааран кэпсээтэ.
Тааһаҕарга бу күннэргэ ходуһаҕа маассабайдык тахсаары олороллор. Быйыл манна үрдүк сир ото үүммэтэх, уолба сиргэ арыый баар диэн кэпсээтилэр. Сайылыкка 74 ынаҕы, ньирэйи сайын устата үс үлэһит көрөллөр, бу нэһилиэк ыалларын сүөһүтэ. Ыанньыксыттар сайылыкка инникитин олорор усулуобуйаны тупсарыыга туох үлэ барыахтааҕын ыйыталастылар, манна билигин электричество уота суох буолан, олорорго мэһэйдэри үөскэтэр. Нэһилиэк баһылыга Семен Каратаев сайылык сирин докумуонун оҥорторбуттарын, салгыы оройуон Сэбиэтин депутата Егор Константиновы кытта уоту тардыыга үлэлэһэ сылдьалларын кэпсээтэ.
«Саҥа саҕалаан эрэр фермер» диэн тыа хаһаайыстыбатын министерствотын гранынан Николай Яковлев 4,5 га сиргэ хортуоппуй олордубут, өссө сибиинньэ иитиитин саҕалаан эрэр эбит. Итини сэргэ Андрей Осипов эмиэ маннык гранынан сүөһү иитиитинэн дьарыктанар сыаллаах-соруктаах хотон тутта сылдьар.
— Тааһаҕар нэһилиэгэ быйылгы улуустааҕы Туругуруу ыһыаҕар ат сүүрдүүтүгэр туох кыахтааҕынан кыттыбыта. Соторутааҕыта ат сүүрдүүтүн федерациятын мунньаҕар быйылгы ыһыахха ыытыллыбыт ат сүүрдүүтүн ырыттыбыт, дьүүллэстибит. Инникитин сааскы, күһүҥҥү ат сүүрдүүтүн тэрийэн ыытыахха диэн этии киирдэ. Аттары булунууга улуус үбүттэн көрөн көмөлөһүөхпүт, онон аты атыылаһарга олус эппиэтинэстээхтик сыһыаннаһыҥ, эдэр кыахтаах ат наада, — диэн тоһоҕолоон бэлиэтээтэ улуус баһылыгын бастакы солбуйааччы Василий Лукин.
Тааһаҕардар интернет сибээһэ мөлтөҕүн, үүтү туттарыы туһунан уонна сайылыктааһыҥҥа туох-ханнык эбии үлэлэр баралларын ыйыталастылар.
