Кини кэриэһигэр ыытыллыбыт панихида сулууспата старославянскай уонна саха тылынан ыытылынна. Суорун Омоллоон үйэтин-сааһын тухары православнай итэҕэл тарҕанарыгар, таҥара кинигэлэрэ сахалыы тылбаастаналларыгар, таҥара дьиэлэрин чөлгө түһэриигэ, о.д.а. сыралаһан үлэлэспитэ.
Төгүрүк остуолу Саха сирин Суруйааччыларын сойууһун бэрэссэдээтэлэ Наталья Харлампьева салайан ыытта. Манна Дмитрий Кононович уола Кирилл Дмитриевич, сиэн балтылара Айна Потапова, Диана Сивцева кытыннылар. Национальнай бибилэтиэкэ бэртээхэй быыстапканы тэрийэн, туруорда.
Бу бэлиэ күҥҥэ Москваттан ыалдьыттар анаан кэлэн, кытыннылар.
Сергей Котькало, Арассыыйа Суруйааччыларын сойууһун эппиэттээх сэкирэтээрин солбуйааччы, Аан дойдутааҕы нуучча норуодунай соборун президиумун бюротун чилиэнэ, Суорун Омоллоон саха норуотун духуобунай лиидэрэ буоларын чорботон бэлиэтээтэ. Суруйааччы 90 сааһын Москваҕа хайдах бэлиэтээбиттэрин аҕынна. Ааспыт үйэ 90-с сылларыгар Владыка Германныын биир тылы булан, Суоттутааҕы комплексы тэрийэргэ үлэлээбиттэрэ. »Мин Дмитрий Кононович курдук улуу киһини кытта билсибиппиттэн киэн туттабын. Хас биирдии көрсүһүү, кэпсэтии умнуллубат. Кини сүҥкэн үлэтэ үйэлэргэ салҕана, аата ааттана турдун», — диэн түмүктээтэ.
Суруйааччы, учуонай, Троицкай-Сергиевай лавра Паломническай киинин үлэһитэ Александр Ананичев лавраҕа Саха сирин, Камчатка, Нуучча Америкатын миссионера, митрополит, Сибэтиитэл Иннокентий көмүллэ сытарын туһунан, үгүс дойдуларга туох үлэни ыыталларын туһунан кэпсээтэ.
Арассыыйа Суруйааччыларын сойууһун сэкирэтээрэ, Оборуона министиэристибэтин »Политрук» сурунаалын бас эрэдээктэрэ Алексей Шорохов »Евангелие» тылбааһа саха култууратыгар, итэҕэлигэр хайдах дьайбытын ырытта.
Иеромонах Никандр Дьокуускайдааҕы, Ленскэйдээҕи Архиепископ Роман аатыттан бу бэлиэ күҥҥэ анаммыт суруйуутун ааҕан иһитиннэрдэ. Владыка бэйэтэ балыыһаҕа киирэн, кыайан кэлбэтэх. »Саха норуотун улуу уола Д.К.Сивцев сырдатааччы, духуобунай лиидэр этэ. Кини Сибэтиэй сурук төрөөбүт тылынан саҥардаҕына эрэ, дьоҥҥо тиийэрин өйдүүрэ. Уустук кэмҥэ Чөркөөххө, Ытык Күөлгэ таҥара дьиэлэрин сөргүтэн, итэҕэл чөлгө түһэрин ситиспитэ. Кини Сибэтиитэл Иннокентий дьыалатын салҕааччы буолар, духуобунай нэһилиэстибэтэ сүҥкэн» диэн суруйууга этиллэр. Иеромонах Никандр Суорун Омоллоону православнай эйгэҕэ апостол тэҥэ буолар диэн эттэ.
Маны тэҥэ, төгүрүк остуолга Гуманитарнай чинчийии, аҕыйах ахсааннаах норуоттар кыһалҕаларын институтун учуонайдара Николай Ефремов, Пантелеймон Петров, тылбаасчыттар Саргылаана Леонтьева, Раиса Сибирякова, суруйааччылар Елена Слепцова-Куорсуннаах, Ольга Пашкевич, ХИФУ сурук-бичик түмэлин дириэктэрэ Афанасий Мигалкин, уо.д.а. тыл эттилэр.
