Сунтаар нэһилиэгэр полиция сотрудниктара баһаартан киһини быыһаатылар.
УУП уонна ПДН начаалынньыгын эбээһинэһин толорооччу старшай лейтенант Алексей Семенов уонна оперативнай дьуһуурунай көмөлөһөөччүтэ, сержант Иван Афанасьев сорудахтан төннөн испиттэр. Д. Данилов аатынан уулуссаҕа быраҕыллыбыт гараас умайа турарын көрбүттэр. Хоп-хойуу буруонан туолбут умайа турар гарааска дьон баарын-суоҕун бэрэбиэркэлээри сүүрэн киирбиттэр. Ыыс-быдаан буруо быыһыгар кими да булбатахтар.
Хорсун санаалаах полиция сотрудниктара биир сырыынан сөп буолбакка, төхтүрүйэн киирбиттэр. Бу сырыыга эр киһи сытарын булан, уоттан таһаарбыттар. Баһаарынай сулууспа биригээдэтэ кэлэн уоту умулларбыт. Гарааска сыппыт киһиэхэ бастакы көмө оҥоһуллубут.
Алексей Семенов 2009 сылтан, Иван Афанасьев 2014 сылтан полиция кэккэтигэр бэриниилээхтик, үтүө суобастаахтык үлэлии сылдьаллар.
