Арыылаах агро хайысхалаах оскуолатыгар «Сунтаар» диэн позывнойдаах Арассыыйа Дьоруойа Дмитрий Егоров сырдык аатын, кини хорсун быһыытын үйэтитэр, ыччакка патриотическай иитиини күүһүрдэр сыалтан “Дьоруой паартата” оҥоһуллан турда. Бу тэрээһин “Наша новая школа” бырайыак чэрчитинэн барда, диэн иһитиннэрэр «Сунтаар сонуннара» хаһыат.
Бу күн Дьоруой аҕата Николай Алексеевич Егоров, бииргэ төрөөбүттэрэ, аймахтара кэлэн кытыннылар, Дмитрий Николаевич туһунан ахтан-санаан аастылар, кини олоҕуттан, дьоруойдуу быһыытын үөрэнээччилэргэ кэпсээтилэр.
Дмитрий дьоно оскуола мусуойугар Герой бескозыркатын, тельняшкатын, Тихоокеанскай морской флот былааҕын, остуолга уурар былаахтары бэлэх ууннулар.
«Бу паартаҕа Арассыыйа Дьоруойа Дмитрий Егоров туһунан элбэх информация баар, QR кодунан киирэн кини туһунан суруйуулары, чугас дьонун ахтыытын о.д.а. ааҕыахха, көрүөххэ сөп.
Дьоруой аатын үйэтитиигэ оскуолаҕа, мусуойга үлэлэр ыытыллыахтара«, — диэн сырдаттылар Арыылаах орто оскуолатын дириэктэрэ Лидия Никитина, иитэр үлэҕэ дириэктэри солбуйааччы Надежда Петрова.
Лидия Никитина, Арыылаах оскуолатын дириэктэрэ,
Надежда Петрова иитэр үлэҕэ дириэктэри солбуйааччы
