Саха судаарыстыбаннай циркэтин салгын гимнасткалара Анна Максимова уонна Пелагея Кычытарова «Цирк эйгэтэ сүрэхтэри холбуур» диэн бастакы норуоттар икки ардыларынааҕы цирковой искусство бэстибээлин Кыһыл көмүс бирииһин ыллылар.
Бэстибээл балаҕан ыйын 17-20 күннэригэр Душанбе (Таджикистан) куоракка буолан ааста уонна дойду тутулуга суох буолуутун 35 сылыгар ананна. Манна 14 дойдуттан артыыстар кытыннылар: Вьетнам, Кытай, Венгрия, Арассыыйа, Казахстан, Монголия, Кыргызстан, Узбекистан, Германия, Италия, Беларусь уо.д.а.
Саха кыргыттара «Дуо Селестия» пааралаах төгүрүккэ нүөмэрдэрин көрдөрдүлэр (салайааччы — СӨ култууратын туйгуна Владимир Куприянов). Бастыҥ бирииһи таһынан кинилэр анал бирииһи – Саратов куоракка ыытыллар XIII Норуоттар икки ардыларынааҕы «Принцесса цирка» цирковой бэстибээлгэ ыҥырыыны туттулар.
«Бу чаҕылхай кыайыы иһин хамаандаҕа ис сүрэхпиттэн эҕэрдэлиибин! Эһиги Саха сирин бүтүн аан дойдуга ааттаттыгыт, биһиги талааммыт бастыҥнартан биирдэстэрэ буоларын дакаастаатыгыт! Салгыы айар ситиһиилэри, саҥа үрдүктэри уонна чаҕылхай кыайыылары баҕарабын!» — диэн Саха сирин култуураҕа уонна духуобунай сайдыыга миниистирэ Афанасий Ноев эҕэрдэлээтэ.
