Бу нэдиэлэҕэ Дьокуускайтан таһаҕас массыыналара айанныахтара. Кинилэр анал дьайыы буойуттарыгар түөрт тиэхиньикэни, ону тэҥэ үс туонна кэриҥэ гуманитарнай таһаҕаһы уонна аадырыстаах баһыылкалары илдьиэхтэрэ. Маршрут Нерюнгри нөҥүө ааһар, манна холуонна баһыылкаларынан эбии хааччыллыаҕа диэн өрөспүүбүлүкэ гражданскай оборона дьыалаларыгар уонна олоххо-дьаһахха куттал суох буолуутун хааччыйыыга миниистирин солбуйааччы Никита Павлов иһитиннэрдэ.
Саха сирин суһал штаба анал байыаннай дьайыыга сылдьар байыастары эбии хааччыйыы былааннаах үлэтин салгыыр. Анал дьайыы зонатыгар тирэх пууннар байыастарга гуманитарнай көмөнү тохтоло суох тиэрдэллэр.
Ону таһынан өрөспүүбүлүкэ сакааһынан «Патриотическай» федеральнайдааҕы ТОР бырагырааматынан «Сокол» квадроцикллар тиэрдиллэллэр. Оҥорон таһаарааччылар «Хотой» FPV-дроннары ыытарга бэлэмнииллэр.
Тэҥинэн байыаннайдарга автотырааныспары, тэрилтэлэртэн, биэдэмистибэлэртэн уонна өрөспүүбүлүкэ олохтоохторуттан баһыылкалары хомуйуу уонна тиэрдии ыытыллар.⠀
«Бу суолталаах кылааттарын уонна биһиги буойуттарбытын өйөөбүттэрин иһин барыларыгар туспа махталбытын биллэрэбит», — диэн Павлов бэлиэтээтэ.
Кини 2026 сыл саҕаланыаҕыттан Саха сириттэн фроҥҥа 45 тиэйии-таһыы оҥоһуллубутун, 134 тырааныспар уонна 203-тэн тахса туонна гуманитарнай көмө уонна аадырыстаах баһыылкалар тиэрдиллибиттэрин чопчулаата.
