Саха сирин баһылыга Айсен Николаевы кытта быһа сибээскэ боппуруостары хомуйуу салҕанар. Өрөспүүбүлүкэ эрэгийиэни салайыыга Киинэ көрдөрөрүнэн, билиҥҥитэ олохтоохтортон 170-тан тахса ыйытыы киирдэ.
Саха сирин дьоно үксүн саахалланар дьиэлэртэн көһөрүү, суол-иис туруга, олорор дьиэ-хомунаалынай хаһаайыстыба, үлэ кыраапыга уонна спорт уонна култуура эбийиэктэрэ тиийимтиэ буолууларын туһунан ыйыталлар.
Ыйытыыны хайдах биэриэххэ сөбүй
Боппуруостары хас да ньыманан ыытыахха сөп:
кол-киин нөҥүө 8 (4112) 506-006 нүөмэргэ үлэ күннэригэр 09:00-18:00;
түүннэри-күнүстэри «Макс» мессенджерга @voprosglaveyakutii_bot бот нөҥүө;
аан бастакытын — 8 (4112) 510-000 нүөмэрдээх «Айта» цифровой көмөлөһөөччү көмөтүнэн.
Саамай элбэх боппуруос Дьокуускай, Алдан, Ленскэй, Нерюнгри уонна Өймөкөөн оройуоннарын олохтоохторуттан киирдэ. Хас биирдии боппуруоһу Саха сирин ЦУР-тын сүрүннээһининэн былаас онно хайысхалаах органа эбэтэр боломуочуйалаах тэрилтэ көрүөҕэ. Олохтоохтор ыйытыыларыгар хоруйдары кол-киин эбэтэр чат-бот нөҥүө ылыахтара.
Саха сирин баһылыгын кытта быһа сибээһи ханна көрүөххэ сөбүй
Быһа сибээс Саха Өрөспүүбүлүкэтин судаарыстыбаннаһын Күнүгэр, балаҕан ыйын 27 күнүгэр, 18:00 чааска буолуоҕа. “Саха” НКИХ, “Якутия 24”, “Россия 24” телеханаалларга, “Тэтим” араадьыйаҕа, «Радио России”, «Виктория Саха», «СТВ-радиоа» араадьыйаҕа, ону тэҥэ регион баһылыгын социальнай ситимнэригэр ыытыллыаҕа.
