Балаҕан ыйын 22 күнүгэр Ньурба улууһугар оробуочай сырыытын кэмигэр өрөспүүбүлүкэ бырабыыталыстыбатын бэрэссэдээтэлин солбуйааччы Сергей Местников Саха сирин норуоттарын IX Спортивнай оонньууларыгар тутуллар тутаах эбийиэктэри тутуу хаамыытын сыаналаата. Ол туһунан sakha.gov.ru сайт иһитиннэрэр.
Ньурба куоракка чэпчэки атлетика манежтаах 3 тыһыынча миэстэлээх стадион уонна физкультура-чэбдигирдэр комплекс тутуллаллар. Тутааччы этэринэн, стадиоҥҥа сүрүн үлэлэр быйыл кыһын түмүктэниэхтэрэ. Сайын саҕаланыытыгар сүүрэр суоллары, оонньуур хонууну ууруохха наада. Бассейн, оонньуу саалата, тустуу уонна тренажернай саалалар киирсэр физкультура-чэбдигирдэр комплекс эмиэ тымныы түһүөн иннинэ ититиигэ холбоноро былааннанар. Ити кыһыҥҥы кэмҥэ ис киэргэтиини ыытар уонна эбийиэги сайын кэлиитэ туттарар кыаҕы биэриэҕэ.
Антоновка сэлиэнньэтигэр федеральнай бырагырааманан интернаты кытта спортивнай единоборство саалата тутуллар. Тутааччылар сыл бүтүөр диэри ититиигэ холбуур былааннаахтар, ол кэнниттэн ис киэргэтии үлэтэ саҕаланыаҕа.
«Үлэ тэтимэ уопсайынан астыннарар: бэдэрээтчиттэр бары былаһааккаҕа көхтөөтөр. Билигин сүрүн сорук — кыһын ис киэргэлигэр киирэр туһуттан, тымныы кэлиэр диэри итиигэ холбонуу. Ити тутууну Оонньуу саҕаланыытыгар болдьоххо түмүктүүр кыаҕы биэриэҕэ. Тэрийэр кэмитиэт уонна улуус дьаһалтатын өттүттэн үөскүүр боппуруостары суһаллык быһаарарга уонна итэҕэстэри туоратарга, тутууну хаачыстыбалаахтык уонна кэмигэр түмүктүүргэ күннээҕи хонтуруолу күүһүрдүөхпүт» – диэн Сергей Местников бэлиэтээтэ.
Хойутаабыт эбийиэктэргэ туспа болҕомто уурулунна. Ньурбаҕа эмтиир корпус тутуута эрдэтээҥи бэдэрээтчит тэрээһинэ суох үлэтиттэн тохтотуллубута. “Монтажник” саҥа бэдэрээтчит тэтимин лаппа түргэтэттэ: кыстыкка диэри тас үлэни түмүктүүр, ититиигэ холбонор түннүктэри, сарайын сабар былааннаахтар. Үбүлээһин боппуруоһа быһаарыллар усулуобуйатыгар эбийиэк ситэриллэн үлэҕэ киириэҕэ.
Чаппанда сэлиэнньэтигэр модульнай спортивнай саала тутуута атын регионтан бэдэрээттэһэр тэрилтэ эбээһинэһин толорботоҕуттан бытаарда. Билигин саҥа толорооччу ааны өстүөкүлэлээһини, туруорууну түмүктүүр. Ахсынньыга ититиигэ холбоммутун кэннэ, эбийиэк бэлэм буолуоҕа.
Ньурба сэлиэнньэтигэр стендовай ытыыга полигон бэлэм буолуута 90% тэҥ, уоту киллэрии боппуруоһа быһаарыллар.
«Үлэ тэтимнээх. Эһиил буолар Оонньууларга элбэх киһи мустуо, тэрээһин бүтүн өрөспүүбүлүкэҕэ бэлиэ буолуоҕа диэн бигэ эрэллээхпит», — диэн Сергей Местников бэлиэтээтэ.
Өрөспүүбүлүкэ норуоттарын IX Спортивнай оонньууларын финальнай түһүмэҕэ от ыйын 7-11 күннэригэр 2027 сылга ыытыллыаҕа. Бырагыраамаҕа барыта 15 спорт көрүҥэ киирэр: аэробика, баскетбол, волейбол, мини-футбол, чэпчэки атлетика, остуол тенниһэ, спортивнай тустуу, дуобат, саахымат, ох саанан ытыы, буулдьанан ытыы, спортинг, бокс, «ГТО Оонньуулара» многоборье уонна пляж волейбола. Квалификационнай күрэхтэһии 2026-2027 сылларга буолуоҕа.
Тэрээһин Россия президенэ Владимир Путин көҕүлээбит «Россия Спорда» федеральнай судаарыстыбаннай бырагырааматын сыалын-соругун толорууга туһуланар.
