Спорт министиэристибэтин коллегията куоластааһын түмүгүнэн спорт адаптивнай көрүҥнэригэр XV өрөспүүбүлүкэтээҕи спартакиаданы Бүлүү улууһугар ыытар буолла. Улахан тэрээһин 2026 сылга буолар, суруйар СИА.
Спартакиаданы ыытыыга Горнай уонна Бүлүү улуустара претенденнээбиттэрэ. Оройуоттар баһылыктара министиэристибэ коллегиятыгар тустаах тиэмэнэн дакылааттары оҥордулар.
Бүлүү улууһун баһылыга Сергей Винокуров бэлиэтээбитинэн, оройуон киинигэр «Эрчим» спортивнай комплекс, сүүрэр манежтаах стадион, спортивнай зал, арочнай спортзал, ГТО икки былаһаакката, спорт көрүҥнэригэр оонньуур былаһааккалар бааллар. Балар тэрээһини ыытыыга сөптөөхтөрө этилиннэ. Спортивнай зал өрөспүүбүлүкэ инвестиционнай бырагырааматынан тутуллуохтаах. «Спорт — норма жизни» бырагыраама чэрчитинэн Кыһыл Сыырга 1482 кв. м иэннээх спортивнай зал тутуллар.
Санаттахха, «Дьулуур» спартакиаданы быйыл аммалар ыыталлар. От ыйын 12 — 16 күннэригэр буолар.
Салгыы былаах бүлүүлэргэ туттарыллар.
