16 От ыйа 16.07
  • 28°
  • $ 87,81
  • 95,78

Сордоҥнооххо бастакы күүлэй кыайыылааҕынан Егор Саввинов буолла

Читайте нас на
Яндекс Новости
ЯДВ

Бу күннэргэ Өймөкөөн улууһун Сордоҥноох нэһилиэгин “Оттоох” ходуһатыгар аан маҥнайгытын “Күүлэй” күрэҕэ ыытылынна. Илии хотуура “сык” гынар тыаһа, охсуллубут күөх от дыргыл сыта толоон устун тэлэһийэ көттө.


Өймөкөөн улууһугар бу сонун күрэх Сордоҥноох нэһилиэгин олохтоох дьаһалтатын уонна тыа хаһаайыстыбатын “Уйгу” кооперативын көҕүлээһининэн ыытылынна. Сыл саҥата биллэриллибит түөлбэнэн күрэхтэһии биир көрүҥүнэн буолбут от охсуутугар 11 эр киһи кытынна. “Кэскил” түөлбэттэн 2, “Чэчиртэн” 3 уонна “Сарыалтан” 6 охсооччу күөн көрүстүлэр.

Саамай эдэр охсооччу Степан Сивцев 22 саастаах уонна аҕа саастаах охсооччу Владимир Готовцев 65 саастаах. Нэһилиэк баһылыга Иван Максимов бу курдук кэпсээтэ: «Төһө да илии хотуура туттуллубат буолбута ырааппытын иһин, бэйэлэрин кыахтарын холонорго сөбүлэһэн кэлбит эр дьон көхтөөхтүк кыттыбыттарын иһин махталбын тиэрдиэм этэ. Нэһилиэкпитигэр тыа хаһаайыстыбата сайдарыгар биир бэйэтэ туспа суолталаах тэрээһиммит үбүн-харчытын ТХПК уонна олохтоох дьаһалта уйунна«. Күүлэй ыытыллыбыт ходуһата кооператив бас билэр сирэ буолар, онон охсуллубут оту мунньууну, кэбиһиитин, тиэйиитин эмиэ барытын дьаһалта дьаһайар соруктаах.

Күрэх усулуобуйатынан, биир киһиэхэ 1 га аҥара быһан бэлэмнэниллибит. Ону таһынан, бэриллибит сир араастаах: кимиэхэ эрэ хойуу уу ото, кимиэхэ эрэ убаҕас хонуу ото, тобукка дылы уулаах, дулҕалаах кураанах да сир баар. Сэрэбиэй быһыытынан сирдэрин оҕустулар. Дьүүллүүр сүбэ бириэмэтин эрэ буолбакка, хаачыстыбаны эмиэ көрдө. Икки чаас буола-буола күүс-уох эбинэллэригэр омурҕан тэрилиннэ.

Эбиэт кэннэ ардах түстэ. Ити эрээри күүлэй кыттыылаахтара быһыллыбыт өлүүлэрин кэмигэр үмүрүттүлэр.

Оту охсууга иккилии чаас үс омурҕан бэриллибит эбит буоллаҕына, биир бастакынан, 3 чаас 50 мүнүүтэнэн бүтэрэн Сунтаар улууһун Бүлүүчээниттэн сылдьар Егор Саввинов бастакы миэстэни ылан, бирииһигэр бензопиланы талла. Кини кэнниттэн 4 чаас 30 мүнүүтэ охсубут Михаил Заболоцкай иккистээн, бирииһигэр мотокосилканы талан ылла. Киниттэн 15 мүнүүтэ хойутаан, эдэр дьоҥҥо холобур көрдөрбүт саамай саастаах охсооччу Владимир Готовцев үһүс миэстэҕэ тиксэн, ылаары кэбит бирииһин – уот генераторын дьиэтигэр илдьэ барда.

Следите за самым важным и интересным в Telegram-канале и WhatsApp-группе ЯСИА